RU

Алматыда тылсым күш тұрғын үйдің суын тоқтатып тастаған

Алматыда жаңадан салынған тұрғынүй кешенінде ауыз судың болмау себебін коммуналдық компания тылсым күштермен байланыстырды.

Бұл туралы КТК арнасы хабарлайды.

5 мың тұрғынға қызмет көрсетіп отырған мекемедегілердің айтуынша, жеті қабат жер астында түсініксіз жайттар болып, салдарынан суды тоқтатуға тура келген. Тек тоғыз қабат төбеде тұрып жатқан жұрттың мұндай уәжге күлуге де шамасы болмай тұр.

Бұл Алматыдағы жұрт түгел көшіп үлгермеген жаңа кешен. «Асыл арман» деген аты болмаса, ауласы тура ауылдағыдай. Шелек көтергендер толып жүр.

"Туалет істемейді. Бәрі сасық үйдің іші. Не болады енді? «Асыл арман» деген атағын не қыламыз оның?", - дейді Ажар Селімбетова есімді тұрғын.

Көбің бұл пәтерлерге «Қолжетімді баспана-2020» бағдарламасы арқылы таласып жүріп әрең қолы жеткен. Бірақ соның қызығын көре алмай отыр. Уақытылы тамақ та пісіре алмайды. Басқа да қиындықтар жетерлік.

Су зардабын тартқан жұрт қазір өз үйлерінде дұрыс дәретханаха да бара алмай жүр. Халық түз жағалап кетпесін деп уақытша мынадай дәретханалар қойылыпты. Иісі деген қолқаны қабады. Сасық иіс жайлағаны сонша, тұрғындар терезелерін қымтап ашпайтын болған.

Осылайша жұрт суды көшеден тасып қана қоймай, басқа тірлігін де тура аулада бітіріп жүр. Ал 5 мыңнан аса тұрғынды тарықтырып қойған коммуналдық компания бәріне кінәлі табиғаттың тылсым күштері деп отыр.

Табиғаттың ісі ғой енді адамның араласқан жұмысы емес. Адамның күшінен тыс нәрселер бұл. Барлығы мүмкін. 

– Мүмкін тылсым күш шығар жер астынан шыққан?

– Мүмкін!

Тылсым күштің беті қашан қайтары белгісіз дейді мамандар. Сол себепті, су зардабын тартқан жұрт жаңа жыл түні де шүмектен қашан су шығар деп тосып отыруы әбден мүмкін.

Мақаланың түпнұсқасы: https://kaz.nur.kz/1000448-almatyda-tylsym-kush-turghyn-uydinh-suyn.html