RU

Алматыға шетелден келген ұстаздар девальвациядан жалақы азайғанын айтып, Назарбаеваға мұңын шақты

Теңгенің күрт құлдырауы шетелдіктердің де қалтасын қаққан. Әсіресе, елімізге сонау Америка, Еуропадан келіп сабақ беріп жатқан оқытушылардың жалақылары едәуір азайып қалыпты деп хабарлайды КТК арнасы.

Алған айлықтарын долларға ауыстырып көңілі қалған профессорлар премьер-министрдің орынбасарына мұңын шақты. Ал білім беру жүйесіне үнемі көңіл бөліп отыратын Дариға Назарбаева барша оқытушыны сабырға шақырып, девальвацияға қарамастан білімді ұрпақ тәрбиелеуді тоқтатпауын сұрады.

Алматыға келсе білім ошағына кірмей кетпейтін Дариға Назарбаева бұл жолы да сапарын оқытушылармен кездесуден бастады. Ал ұстаздар қауымы оған бірден қаржылай қиындықтар туралы айта жөнелді. Теңгенің құнсыздануы, әсіресе, америкалық үлгідегі КИМЭП-ке ауыр тиіп жүр екен.

"Теңге девальвациясы өте жаман,  осы уақыт өте қиын. Мүмкін 3-4 жылдан кейін жақсырақ уақыт келеді. Бірақ, қазір қиын", - дейді КИМЭП профессоры Дэвид Лэндис.

Аз ақшаға көнгісі жоқ кейбірі тіпті кері қайтуды ойластырып жүр екен. Ол аздай, Білім министрлігі де, кілең шетелдік мұғалімдерді шақыртатын оқу орындарына талапты күшейтіп жіберіпті.

"Шетелден алдыратын оқытушыларымызға жұмысқа рұқсат қағазды созбалаңға салып жіберді. Көбі, күтіп шаршайтыны сонша, соңынан мұнда келуге бас тартып жатады", - деді КИМЭП президенті Чан Ян Бэнг.

Қашан да білім саласына көңіл бөліп отыратын Дариға Назарбаева жоғары оқу орнына жәрдемін аямайтынын айтты. Қағазбастылықты азайтқанымен, қаржылай қыспақтардан бірлесіп шығу қажет деді ол америкалық мұғалімдерге ағылшын тілінде.

"Бұл дағдарысты жалғыз біз емес, көптеген мемлекеттер бастан өткеруде. Мұнай бағасы күн санап арзандап жатыр. Жағдайдың қашан тұрақталары да белгісіз. Бірақ, біздің Елбасы жүктеген бір міндетті ұмытпауымыз қажет. Ол – білімді ұрпақты тәрбиелеу. Сол себепті, қаржылай қыспаққа түстік екен деп білім беруді тоқтатуға тиіс емеспіз", - деді премьер-министрдің орынбасары Дариға Назарбаева.

Намысты қамшылағанымен, Дариға Назарбаева білім ордаларының бәрін бірдей басынан сипай қойған жоқ. Әсіресе, дәрігерлерді дайындап жатқан ұлттық медицина университетінің басшысына шүйлікті.

- Коррупции нет у вас?

- Нет коррупции.

- Не продаёте зачёты, экзамены?

- Что вы, что вы...

- Точно?

- Точно.

- Тогда откуда плохие врачи берутся?

Вице-премьер студенттерді сылбыр оқытатын оқу орындарына кешірім болмайтынын қатаң ескертті. Бұл, әсіресе, дәрігер мен мұғалімдерді даярлайтын білім ошақтарына қатысты айтылған сын. Өйткені жұрттан түскен шағымдардың көбі осы сала мамандарына тиесілі екен.

Мақаланың түпнұсқасы: https://kaz.nur.kz/1014252-almatygha-shetelden-kelgen-ustazdar-de.html