RU

Алматыда автобус жүргізушісі «Оңайдың» кесірінен көзінен айырылып қалды

Алматыда 13-ші бағыттағы қоғамдық көлік жүргізушісін екі жігіт тапа-тал түсте, көлік тізгінінде отырған жерінде сабап кеткен деп хабарлайды КТК арнасы.

Бұған жәбірленушінің жолаушылардан «Оңай» аппараты арқылы төлем жасауды талап етуі себеп болыпты. Оңбай таяқ жеген 55 жастағы азаматты дәрігерлер 10 қаңтарда жасалатын отаға дайындап жатыр.

Алпысты алқымдаған автобус жүргізушісінің қазіргі күйі - екі көзі жұмулы күйде сұлқ жатыр. Кешелі бері есін әрең жиып, адамдармен енді ғана тілге келген. Осы жұмыста жүрген 20 жылында мұндай оқиғаға кезікпегенін айтады. «Оңай» қондырғысымен жолақы төлеуін сұраса, екі жігіт ерегісіп, тіпті ақша төлеуден бас тартыпты.

"Сонымен, төлеңдер деп едім, ерегесті менімен. Жібере салайын дегем, маған дөрекі сөйледі. Сонымен Горький парк жақтағы ақырғы аялдамаға дейін барды. Содан барып, тұра бергенім сол екен рөлден, артымнан қолмен ұрды. Содан 3-4 рет ұрды, содан кейін қашып кетті екеуі", - дейді автобус жүргізушісі Қалдыбек Байтаманов.

Төбелес автобустың ішінде, Қазыбек би және Абдуллиндер көшелерінің қиылысында болған. Оқиға орнын сол маңдағы куәгерлер телефондарына түсіріп алыпты. Әуелде ет қызуымен соққылардың зардабы аса білінбепті. Бірақ, жедел жәрдеммен ауруханаға жеткізілгеннен кейін жарақатының тым ауыр екені сезіле бастаған. Дәрігерлер де оның жағдайының қиын екенін айтып отыр.

"Сол көзі түк көрмейді. Оң көзінің көруі нашарлаған. Бас сүйегі жарақаттанып, миы шайқалған. Көзінің айналасындағы сүйегінің, мұрнының да сынған жерлері бар. Ота жасап, оң көзін мүмкіндігінше емдеп алуға тырысамыз. Ал сол жақ көзі сол күйі көрмей қалуы мүмкін", - дейді Алматы қалалық орталық клиникалық ауруханасының бөлім меңгерушісі Лариса Николайчук.

Полицейлер бұған қатысты қылмыстық іс қозғап, басбұзар екеудің тұлғасын анықтап та қойыпты. Қазір іздеп жатыр. Ұсталса, екеуі де кем дегенде 5 жылға сотталуы мүмкін.

Мақаланың түпнұсқасы: https://kaz.nur.kz/1040854-almatyda-onhay-ushin-tayaq-zhegen-avtob.html