RU

Әлемге әйгілі Цукерберг шымкенттік кәсіпкерді сотқа беруі мүмкін (фото)

Әлемге танымал WhatsApp мессенджері атауын пайдаланған шымкенттік кәсіпкердің басы пәлеге қалатын түрі бар. Шымкентте «Уатсап» деген дәмхана бар екенін білген Әділет министрлігі белгілі брендті заңсыз қолданған кәсіпкерге ескерту жасады деп хабарлайды КТК арнасы.

Тегін жарнамамен клиент тартып жүрген кәсіпкер миллиондап айыппұл төлеп, тіпті түрмеге жабылуы да мүмкін.

"Әлемге әйгілі тауар белгісін қолданған кәсіпкер әкімшілік, тіпті қылмыстық жауапкершілік туралы білмеген болар. Бірақ, егерде осы тауар белгісінің заңды иесі осы жағдай туралы хабардар болса, онда ол сотқа шағымдануы мүмкін. Және осы жағдайда кәсіпкер үлкен айыппұл төлейді", - дейді Әділет министрлігінің ресми өкілі Олжас Рамазанов.

Бұл кафенің ашылғанына 11 ай ғана болған. Қабырғаларын WhatsApp-тағы смайликтермен безендіріп, ішіндегі үстелдеріне дейін танымал брендтің суретін іліп қойыпты. Ал, мәзірдің өзінде тіпті «Уатсап» деп аталатын фирмалық салат та бар.

Тағы оқыңыздар: Депутат қымбат көлігі мен зәулім үйін көрсетіп, мақтанатын байларға салықты көбірек салуды ұсынды

Бірақ, кәсіпкер Асқар Мүсірәлиевтің өзі ісін заңсыз деп ойламапты. Жастарды тарту үшін месенджердің атауын қоя салдым деген ол енді әйгілі компания тарапынан қиындықтар туа ма деп алаңдайды. Тіпті, қысым көрер болса дәмхана атын жедел ауыстырам деп ақталып отыр.

"Мен бұны ұрлық деп ойлаған жоқпын. Білмедім. Болмайтын болса атауын өзгертем. Басқа атпен тіркелем", - дейді кафе қожайыны.

Мақаланың түпнұсқасы: https://kaz.nur.kz/1524388-alemge-aygili-cukerberg-shymkenttik-k.html