RU

Биылғы ҰБТ-дан ең жоғарғы балды алматылық түлек жинаған

Биыл Ұлттық бірыңғай тестілеу жаңа форматта өтті. Нәтижесінде ең жоғары 140 балды ешкім жинай алмады. Бұл туралы ОКҚ-де өткен арнайы баспасөз мәслихатында Білім және ғылым министрлігі Ұлттық тестілеу орталығының директоры Рамазан Әлімқұлов мәлімдеді, деп хабарлайды Baq.kz.

«Биыл Ұлттық бірыңғай тестілеу 20-27 маусым аралығында еліміздің 165 ҰБТ өткізу пунктінде жаңа форматта өткізілді. ҰБТ-ға өтініш берген оқушылардың саны 92 мыңнан астам. Ал ұлттық бірыңғай тестілеуге 88 мыңнан астам оқушы қатысты. Еліміз бойынша орташа балл – 80,5. Жаңа форматта өткен ҰБТ-да ең жоғарғы балды Алматыдағы Мұқағали Мақатаев атындағы мектептің оқушысы Тасан Саят жинады. Оның көрсеткіші - 139 балл. Ал 140 балды ешкім ала алған жоқ», - деді ол.

Сонымен қатар Рамазан Әлімқұлов 74 мыңнан астам оқушының ҰБТ-да төменгі көрсеткіштен жоғары балл жинағандығын атап өтті.

Тағы оқыңыздар: Алматылық вундеркинд бала 12 жасында мектепті үздік бітіріп шықты

«ҰБТ-да төменгі балл – 50. Емтихан барысында 74 517 түлек осы көрсеткіштен жоғары балл жинады. Бұл – 84%-ды құрайды. Өкінішке қарай, қалған оқушылар төменгі балл жинады», - деді ол.

Оның айтуынша, ҰБТ-дан өте алмаған оқушылар оны қайта тапсыра алады.

«Жаңа ереже бойынша төмен балл жинаған оқушылар тамыз айында ҰБТ-ны қайта тапсыра алады. Егер тамыз айында емтиханнан өте алмаса, ендігі жылдың тамыз айында ҰБТ-ны үшінші рет қайта тапсыруға мүмкіндігі бар», - деді ол.

Сөз соңында Ұлттық тестілеу орталығының директоры емтихан ережелерін сақтамағаны үшін қанша оқушының ҰБТ-дан шығарылғандығын айтты.

«ҰБТ-ның өтікізу ережесі мен тыйым салынған заттарды қолданғаны үшін тестілеуден 12 адам шығарылды. Тестілеу барысында түлектерден 85 мыңнан астам тыйым салынған заттар алынды», - деді ол.

Мақаланың түпнұсқасы: https://kaz.nur.kz/1541143-bilyghy-ubt-dan-enh-zhogharghy-baldy-almaty.html