RU

Назарбаев елімізге алғаш келген Германия президентін риясыз күлдірді

Мемлекет басшысы Нұрсұлтан Назарбаев елімізге ресми сапармен келген Германия президенті Франк-Вальтер Штайнмайермен кездесті. Ара-тұра қалжыңдасудан бас тартпайтын елбасы бұл кездесуде де әзілдесуді ұмытпады деп хабарлайды Sputnik Қазақстан.

Сөз басында мемлекет басшысы елімізге ресми сапармен және ЭКСПО-ға арнайы келген Германия президентіне алғыс айтып, Қазақстан мен Германия арасындағы ынтымақтастықтың нығая беретініне сенім білдірді.

Өз кезегінде мәртебелі мейман да қонақжай қазақ еліне ризашылығын айтты.

Тағы оқыңыздар: Еліміздегі ең сәнді киінетін шенеунік кім?

"Мен Қазақстанға алғаш рет келіп отырған жоқпын. Бірақ президент ретінде тұңғыш рет сапар жасап отырмын. Бұл елге келуге себеп көп, сіздің еліңізді білемін, бұрын танысқанмын. Бірақ биылғы жыл біз үшін ерекше, өйткені екі ел арасындағы дипломатиялық қарым-қатынасқа 25 жыл", — деді Штайнмайер.

Ол осы уақытта екі елдің экономикалық, саяси және мәдени ынтымақтастығы дамып, нығая түскенін атап өтті.

"Астанада өтіп жатқан ЭКСПО көрмесіне неміс компаниялары мен ұйымдарының белсенді қатысуы осы жемісті ынтымақтастықтың бір көрінісі болып табылады. Көрмедегі Германия күніне менің сапарымның дөп келуіне өте қуаныштымын. Мен сізді герман павильонын аралауға шақырғым келеді, бірақ сізді…", — дей бергенде елбасы:

"Маған шақыру қажет емес шығар", — деп әзілдеді. Бұл қалжыңға екі президент те риясыз күліп алды.

"Сондықтан менің сізге алғысым шексіз. Мен біздің елшілік сізді баяғыда шақырып қойғанын білемін. ЭКСПО мен Германия павильонын бірге тамашалау мүмкіндігі үшін сізге рақмет айтамын", — деді сөзін жалғаған Германия президенті.

Тағы оқыңыздар: Түркияға қыдырып барған жерлестеріміз қонақ үй таппай тентіреп кетті

Айта кетейік, бүгін Қазақстанға ресми сапармен Германия президенті келді. Франк-Вальтер Штайнмайер Германия президенті болып 2017 жылы 19 наурызда сайланды. Ол әр жылдары Германия вице-канцлері, Сыртқы істер министрі болып қызмет еткен.

Мақаланың түпнұсқасы: https://kaz.nur.kz/1552371-nazarbaev-prezident-retinde-elge-algh.html