RU

Жеңіл жазамен құтылып кеткен атышулы "шымкенттік Үсеновтің" әкесі кім?

Адам өлімімен аяқталған жол көлік апатын жасап, жеңіл жазамен құтылып кеткен "шымкенттік Үсенов" деген атқа ие болған Исмаил Сүлейменнің әкесі кім екені белгілі болды, деп хабарлайды өңірдегі NUR.KZ тілшісі.

Исмаил Сүлейменнің әкесі - Ерехан Сүлейменов - бизнесмен. Оның үстінен 2010 жылы қылмыстық іс қозғалып, бірақ кейін іс қысқарып кетеді. Ал қазір бизнесменге "Аса ірі көлемдегі ақша бопсалау және алаяқтық" бабы бойынша айып тағылып отыр. Бүгінде ол қамауға алынған, тергеу амалдары жүріп жатыр.

Тарқатып айтқанда, түркістандық «Ақ жол» ЖШС-нің директоры Сабыржан Атаев Исмаил Сүлейменнің бизнесмен әкесі өзінен ақша бопсалады деп құзырлы органдарға шағым түсірген. Серіктестік директоры Атаев бұл жолы да айыпталушы сүттен ақ, судан таза боп шыға ма деп алаңдаулы.

Тағы оқыңыздар: Соңғы 25 жылда білім беру саласын эксперимент алаңына айналдырған министрлер кімдер?

Осы мақсатпен ОҚО прокуроры Ибраһим Имановтың атына арыз тастап, бұл істі облыс прокурорының өзі бақылауға алуын өтінген.

Еске салсақ, BMW көлігін тізгіндеген Исмаил Сүлеймен өткен жылдың тамызында жылу құбырларының жөндеу жұмыстарын жүргізіп жатқан төрт жұмысшыны қағып, біреуін мерт қылған. Кейін оған 21 жастағы Мұрат Әлібектің өмірін жалмаған көлік апатын жасады деген айып тағылды.

20 жастағы «шумахер» апат болған жерге көлігін тастай сала, ізін суытқан. Жергілікті полицейлер қаншама іздестіру шараларын жүргізгенімен, ақыры халықаралық іздеу жариялауға тура келді. Ең қызығы, осы жылдың наурыз айында шымкенттік «шумахердің» ісі әкімшілік сотта қаралып, судья Нұрлан Әлиев атышулы іске нүкте қояды.

Сот шешімінде оқиға орнында көз жұмған Мұрат Әлібек туралы бір сөз жоқ. Тек жаяу жүргіншінің денсаулығына жеңіл жарақат салғаны және көлік апатын жасай тұрып, оқиға орнынан бой тасалағаны үшін ғана жаза берген. Сондай-ақ, сот шешімінде көлік ішінде болған қару туралы да айтылмаған.

Тағы оқыңыздар: Дүкеннен 16 шоколад пен виски ұрлаған ақтөбелік тұрғын істі болды

Айта кетерлігі, көлік апаты болған соң облыстық ІІД-лер көлік ішінде қарудың болғанын ресми мәлімдеген болатын. Қысқасы, Исмаил Сүлеймен тек айыппұл төлеп, екі жылға көлік басқару құқығынан ғана айырылды.

Бұл шешім өз кезегінде жұртшылықтың наразылығын тудырып, тіпті шымкенттік белсенді Амангелді Қалыбек «Мені Мұрат Әлібек деп атаған. Мен 21 жаста едім. Мен қайтыс болдым!» деген жазуы бар парақшамен қала көшелеріне шығып, адам өліміне себепші болған көлік жүргізушісі тиісті жазасын алуын талап етті.

Мақаланың түпнұсқасы: https://kaz.nur.kz/1598168-zhenhil-zhazamen-qutylyp-ketken-atyshuly.html