RU

Қызылордада балабақша көлігі апатқа ұшырап, тәрбиеші қаза тапты

Қызылорда қаласында балабақша көлігі апатқа ұшырап, тәрбиеші қаза тапты. Сондай-ақ жарақаттанған балалар да бар деп хабарлайды Baq.kz агенттігі.

Бейресми дерекке сүйенсек, 25 тамыз күні кешке балаларды балабақшадан үйіне алып шыққан Газель жүк көлігіне соқтығысқан. Салдарынан балабақша тәрбиешісі Эльмира Сейілова аурухананың жан сақтау бөліміне түскен. Алайда ажалдан өмірін арашалап қалу мүмкін болмапты.

Сонымен қатар, көліктегі балалар да жарақаттанған. Олардың жағдайы жайлы әзірге мәлімет жоқ. Ал балабақша көлігі «Хандәулет» балабақшасына тиесілі екен.

Тағы оқыңыздар: Парламент палаталарының бірлескен отырысы қай күні өтетіні белгілі болды

Қайтыс болған тәрбиешінің көршілерінің бірі Болаттың айтуынша, балаларды таситын көлікті 25-ке толмаған жас жігіт жүргізіп келген.

«Естуімше, шопырдың өзі сап-сау дейді. Оның тәжірибесі бар-жоғы тексеріліп, анықтала жатар. Ал қаза болған болған келіншек 1985 жылы туған. Оның артында жолдасы мен төрт баласы қалып отыр. Аяқ астынан болған қаза жақындарына оңай тиіп отырған жоқ», – дейді ол.

Ал Эльмира Сейілованың туыстарының бірі Айманның айтуынша, марқұм апат кезінде басынан соққы алған және қолы қатты жарақаттанған.

«Көліктегі балалар аман екен. Үш бала зардап шегіпті. Эльмираның қасында тағы бір келіншек болған, ол да абырой болып аман қалыпты. Тек Эльмираның жағдайы ауыр болыпты. Оның балабақшаға жұмысқа тұрғанына да бір жылдай болып қалған еді. Көлік жүргізетін бала 1993 жылғы екен. Алдында келе жатқан көлікті айналып өтем деп, жолдың қарсы бетіне шығып кетіпті», – дейді ол.

Тағы оқыңыздар: Еліміздің кейбір аймақтарында өткінші жаңбыр жауып, жел тұрады

Облыстық ішкі істер департаменті баспасөз қызметінің маманы Салтанат Мұратовамен тілдескенімізде ол осы жол апатына қатысты Қылмыстық кодекстің 345-бабы 1-бөлігіне сәйкес қылмыстық іс қозғалып, тексеру жұмыстары жүргізіліп жатқанын жеткізді. Алайда, оқиғаның қалай болғаны туралы ашық айтпады.

Мақаланың түпнұсқасы: https://kaz.nur.kz/1600304-qyzylordada-balabaqsha-koligi-apatqa.html