RU

Сегіз баласын аяққа тұрғызған алматылық жанұя тағы бесеуін асырап алған

Алматылық Кумашевтар отбасы 8 бала өсіріп, тағы бесеуін балалар үйінен асырап алған. Оған қоса, жетім балаларға әлеуметтік көмек көрсететін қоғамдық қор құрып, тиісті жұмыс жүргізіп жатыр деп хабарлайды КТК арнасы.

Қамқорлығына алғанына небәрі 8 ай өтсе де, бүлдіршіндер жаңа ата-анасына әбден бауыр басып қалыпты. Өз балалары есейіп, үйлі-баранды болып кеткен соң балажан кісілер әулетін кеңейтуді ұйғарыпты.

"Өзіміздің әулетіміз көпбалалы болып, бірақ, алды өсіп-өніп кеткеннен кейін үлкен үйіміз босап қалған сияқты болып қалды. Сосын кішкентай сәбилер аз болып қалды, жоқ десе де болады. Немереміз қолымызда еді, оны жібердік. Бірақ сол немеремен айналысып, осындай кішкентай бала керек-ау деп қалдық", - дейді көпбалалы әке Асхат Кумашев.

Тағы оқыңыздар: Ақмола облысында 12 жасар қыз анасына есірткі сатуға көмектескен

Осы оймен 8 ай бұрын Алматыдағы №1 балалар үйінен Рамазан, Еркін, Тимур, Карина және ең кенжесі 4 жастағы Керімді «Қабылдаушы отбасы» бағдарламасы арқылы шаңырақтарына әкелген. Олардың жаңа үйге тез үйреніп кетуі үшін әсіресе аналары Аидаға көп еңбектенуге тура келіпті.

Аналарының айтуынша, балалар үйінде бар жағдай жасалғанымен, кішкентайларға таза ата-аналық тәрбие жетіспейді. "Осында келген 8 ай ішінде біз соны саналарына сіңдіре алдық", - дейді ол.

Дегенмен, Кумашевтар мемлекеттен бөлінетін 35 мың жалақы мен әр балаға берілетін 22 мың теңгенің аз екенін айтады. Өздері ауырлық сезінбесе де жағдайы көтермейтін отбасылар үшін қиын тиеді дейді.

Тағы оқыңыздар: Ақылы білім алғысы келетіндер ҰБТ тапсырмауы мүмкін

Мұны Мәжіліс депутаттары да мойындап отыр.

"Кем дегенде бір балаға 60-70 мың теңге бөлінуі тиіс. Егер бес бала асырап алатын болса, беске көбейтілуі керек. Мәселен, Ресейде бір балаға 16 мың рубль, яғни 90 мың теңге беріледі. Ал бізде төменгі күнкөріс дейгейінен де аз", - дейді депутат Ирина Смирнова.

Айталық, балалар үйінде әр бүлдіршінге ай сайын 130 мың теңге жұмсалады екен. Сондықтан, депутат ата-аналарға берілетін қаржылай көмекті қалайда арттыру керек дейді.

Мақаланың түпнұсқасы: https://kaz.nur.kz/1615505-segiz-balasyn-ayaqqa-turghyzghan-almaty.html