RU

Жамбыл облысында түрмеден қашып кеткен қылмыскерлердің суреті жарияланды (фото)

Жамбыл облысындағы қоныс колониясында сотталғандар бостандықта жүр! Олар түзеу мекемесінен шығып кеткеннен кейін қайта оралмаған деп хабарлайды КТК арнасы.

Қашқындарды колония басшылығы жатпай-тұрмай іздеген екен. Енді таппаған соң елден көмек сұрауға мәжбүр. Бұл азаматтар алаяқтықпен айналысып, және ұсақ-түйек ұрлық жасап түрмеге түскен. Сөйтіп, жақсы тәртіптері үшін қоныс колониясына ауыстырылып, тіпті жұмысқа да орналасып алыпты.

Тағы оқыңыздар: Семейде баласын жоғарыдан лақтырған келіншек аналық құқынан айырылмақ

Мұнда кәдімгі түрмедегідей қатаң тәртіп жоқ. Бірақ сонда да осы алты сотталушы кеткен ізімен қайта келмепті. Алды бір жыл бұрын шығып кетіп оралмаса, соңғысы осыдан екі апта бұрын жұмысқа деп кетіп, содан ары ізім-қайым жоғалған. Барлығы Алматы облысының тумалары. Енді бұлар қолға түссе, жаза үстіне жаза жамап алмақ.

"Қашып жүрген алтаудың ішінде екеуінің жаза мерзімі аяқталған. Біреуіне бір ай қалған кезде мекеме аумағынан кетіп қалған. Екіншісінің осы тамыздың 26-да жаза мерзімі аяқталып, босап шығуы керек еді. Қалғандарына бір жылдай бар әлі", - дейді ЖД-158/5 мекемесі бастығының міндетін атқарушы Төлен Бұзауов.

Әлеуметтік желілерде қылмыскерлердің суреті тарап, олардың қарулы әрі қауіпті екені сөз етілген.

Мақаланың түпнұсқасы: https://kaz.nur.kz/1618242-zhambyl-oblysyndaghy-qonys-koloniyasyn.html