RU

Ақтөбеде су тасқынынан зардап шеккен көпбалалы әйел екіқабат кезінде асылып өлген

Ақтөбе қаласындағы Қарғалы бау-бақша ұжымында тұрған Қонақбай Кабаров қазір 4 баланы өзі бағып отыр. Көктемгі су тасқынынан соң әйелі Бинеш Жалғасова өз-өзіне қол жұмсаған, деп хабарлайды Aktobenews.kz.

Қонақбай Кабаров пен Бинеш Жалғасова Қазақстанға Өзбекстаннан қоныс аударған. 16 жасында тұрмысқа шыққан Бинеш Жалғасованың жеке куәлігі мүлде болмапты. Көші-қон департаментіне барып, құжат жасату үшін несие алып, көмек те сұраған. Бірақ құжат рәсімдеу мүмкін болмады. Ал биыл көктемде жалғыз баспанасы суға кетіп, үйі тұруға жарамсыз болып қалған.

Тағы оқыңыздар: Астанада ойнап жүрген мектеп оқушысы тоққа түсіп, қолынан айырылды (фото)

«Су тасқынынан соң үйіміз апатты деп танылып, бізге Сазды ауылынан жер берілді, 1 миллион теңгенің сертификаты тағы бар. Үйдің ені 9, ұзындығы 11 метр болды. Бинеш ештеңе сездірмеді, өзінің қиналып жүргенін айтпады. Жүкті келіншегім шілде айының 17-сі күні өз-өзіне қол жұмсады.

Құрылыс жүріп жатқан еді, кейін бәрін қалалық әкімдік өз міндетіне алды. Біз құрылыс кезінде далада тұрдық. Қазір екі балам мектепте, біреуі өзімнің жанымда жүр. Бір баламды нағашыларына беріп, Жаңаөзенге жібердім. Алдағы уақытта 3 жастағы қызымды балабақшаға беріп, өзім жұмысқа орналасқым келеді»,- деді Қонақбай Кабаров.

Бұл отбасыға Ақтөбе қалалық әкімдігі көмек көрсетті. Қала әкімінің орынбасары Рузия Айдашеваның айтуынша, Кабаровтар отбасына үй салып, тұрмыстық техникасы сатып алынған.

Тағы оқыңыздар: Канадада 27 жастағы қазақстандық азамат мерт болған

«Теледидар, тоңазытқыш, кір жуу машинасы алынды. Үйін дайын күйінде тапсырамыз»,- деді ол.

Бұл отбасы бірер күннен соң жаңа үйге қоныс аударады. Қайғылы жағдай тіркеліп, қиындықты бастан кешірген отбасы қиын кезде көмектестен әкімдік қызметкерлері мен «Қолғанат Ақтөбе» қайырымдылық қорына алғысын айтты.

Мақаланың түпнұсқасы: https://kaz.nur.kz/1623521-aqtobede-su-tasqynynan-zardap-shekken-2.html