RU

Мәжіліс депутаты сұраққа қазақша жауап бере алмаған шенеуніктерге шүйлікті

Шенеуніктердің қазақ тілінде сөйлемеуі мәжіліс депутаты Бақытжан Әбдірайымның намысына тиді деп хабарлайды Sputnik Қазақстан.

Бүгін мәжілісте өткен үкімет сағатында бас бостандығынан айыру орындарынан босатылған және пробация қызметінде есепте тұрған азаматтарды әлеуметтік оңалтудың 2017-2019 жылдарға арналған кешенді стратегиясын іске асыру мәселесі талқыланды. Отырыста бас баяндамашы Ішкі істер министрі Қалмұханбет Қасымов орыс тілінде сөйледі. Депутаттардың қазақша сұрағына министрдің өзі де, басқа шенеуніктер де орыс тілінде жауап берді.

"Бүгінгі біздің талқылап жатқан сұрақ өте маңызды және өзекті. Бірақ бұдан да зор бір мәселеге біз бүгін жауап таппадық, құрметті әріптестер. Және ол менің көңіліме, намысыма қатты тиді. 12 қазақ тілінде, яғни мемлекеттік тілде берілген сұрақтың 11-іне орыс тілінде жауап берді. Кім жауап берді? Әкімнің орынбасары, әлеуметтік қорғау министрінің орынбасары, олар кіммен жұмыс істейді? Халықпен жұмыс істейді. Олар қазақ тілінде жауап бере алмаса, қалай жұмыс істейді?!", — деп кейіді депутат.

Тағы оқыңыздар: Қостанайлық полицейлер 10 жасар баланы рұқсатсыз алып кеткені үшін кешірім сұрады

Осы ретте халық қалаулысы елбасының рухани жаңғыру жөніндегі өз мақаласында "мемлекеттік тілді құрметтеу — тәуелсіздікті құрметтеу" деп айтқанын еске салды.

"Міне, бүгін жиынның басынан соңына дейін төрағамыз Владимир Карпович (Владимир Божко – мәжіліс төрағасының орынбасары) қазақ тілінде жүргізіп жатыр. Магеррамов мырза баяндамасын таза қазақ тілінде оқыды, Снежанна Имашева деген біздің қарындасымыз қазақ тілінде сөйлейді. Шиповских болса бізден жақсы қазақша сөйлейді", — деді Әбдірайым.

"Біздің регламентте қазақ тілінде, яғни мемлекеттік тілде сұрақ қойылса, сол тілде жауап берілуі керек деп тікелей көрсетілген. Біз бұған қазір шектеу қоймасақ, осылай жалғаса береді. Сол себептен, төраға мырза, менің өтінішім, болашақта бізге келетін лауазымды қызметкерлер мемлекеттік тілде сұрақ қойылса, сол тілде жауап беруге тырыссын", — деген өтінішін білдірді депутат.

Тағы оқыңыздар: Алматыда тағы бір автобус жол апатына түсіп, екі адам зардап шекті (фото)

Отырыстан кейін министр Қалмұханбет Қасымов өз тарапынан бұл олқылықтың орнын толтыруға уәде берді.

"Бұл мәселені орнына келтіреміз. Ендігі үкімет сағатына келген кезде, бұл ескертулер орындалады", — деді Қасымов БАҚ өкілдеріне.

Айта кетсек, осы жиында дайындалмай келіп, қағаздан бас көтермеген шенеуніктер депутат Зағипа Балиевадан да сөз естіген болатын.

Мақаланың түпнұсқасы: https://kaz.nur.kz/1627871-mazhilis-deputaty-suraqqa-qazaqsha-zhau.html