Қарағанды облысында су тасқыны болды (фото)

Тоқтаусыз жауған жаңбыр мен қардың еруінен Қарағанды облысындағы Теміртау және Абай қалаларында бірнеше үйді су басты деп хабарлайды NUR.KZ.

Төтенше жағдайлар департаментінің ресми мәліметіне сүйенсек, кеншілер қаласында жеті үй мен ауланы су басқан.

Қазір оқиға орнында құтқарушылар мен жергілікті билік өкілдері табиғи апат салдарымен күресу жұмыстарын жүргізуде.

Мамандардың айтуынша, әсіресе Көкпекті ауылындағы Бұқар Жырау ауданында су басу қаупі жоғары. Осыған дейін де Көкпекті ауылын бірнеше рет су шайған болатын.

Қазір ауылда су арнасын бұру, құм себу сияқты тарату жұмыстары атқарылып жатыр.

"Қардың үздіксіз еруінен республикалық маңызы бар "Қарағанды-Аягөз-Бұғаз" тасжолы мен облыстық маңызы бар "Қоянды-Егіндібұлақ-Бүркітті", "Ынталы-Бесоба" жолдарынан су ағып келген.

Оқиға орындарына ескерту белгілері орнатылып, онда құтқарушы қызметкерлер кезекшілік етуде. Елді мекендерді су шаю қаупі жоқ", - дейді Қарағанды облыстық ТЖД баспасөз қызметі.