RU

Назарбаев: Құдайға шүкір, бізде мұнай мен газ, алтын - бәрі бар

Нұрсұлтан Назарбаев инновациямен тек артық қаражаты бар елдер ғана айналысатынын жеткізді. Сондай-ақ, президент Қазақстанның мұнайы, газы мен алтыны бар болғаны үшін "Құдайға шүкір" айтты деп хабарлайды NUR.KZ.

Фото: NUR.KZ
Фото: NUR.KZ: UGC

"Кімнің артық қаражаты болса, сол мемлекет инновациялық жобамен, индустрияландырумен айналыса алады. Міне, біз белгілі бір дәрежеге қол жеткізіп, шикізатқа пара-пар экономиканы құру үшін, алты жылдан бері сол жаһандануға бет бұрдық.

Бізде мұнай, газ, темір, қорғасын, мырыш, алтын - бәрі бар, Құдайға шүкір! Бірақ, көріп отырғанымыздай, әлемдік нарықтағы жағдай бір орында тұрмайды", - деді Назарбаев "100 жаңа кітап" жобасы аясында ұйымдастырылған шара барысында.

Айтуынша, биржалық тауарлар бағасы күнде өзгеріп отырады.

"Өткен жылы мұнайдың бағасы - барреліне 140 доллар еді. Содан кейін 30-ға түсіп кетті. Енді 50-60 болғанына қуанып отырмыз. Ал ертең не боларын біз білмейміз. Сондықтан басқаша әрекет етіп, соңғы алты жылда 1200 жаңа өндіріс орнын салдық. Бұл мамандардың білімін арттырып, басқаша айлық төлеуге ықпал етеді", - деп қорытындылады елбасы.

Айта кетейік, бүгін Назарбаев университетінің қабырғасында "100 жаңа кітап" жобасы бойынша шет тілдерінен аударылған 18 кітаптың таныстырылымы өтті.

Мақаланың түпнұсқасы: https://kaz.nur.kz/1726286-nazarbaev-kdajga-skir-bizde-mnaj-men-gaz-altyn-bri-bar.html