Ресейдегі әлем чемпионатының 1/8 финалындағы алғашқы жұптар анықталды деп хабарлайды prosports.kz сайтына сілтеме жасаған NUR.KZ.
В тобының үшінші турында көш басындағы Испания келесі кезеңге шығу мүмкіндігінен айырылған Марокко құрамасымен кездескен. Испан футболшылары шешуші матчта ұпай жоғалтты.
Ойынның 14-минутында Халиб Бутаиб есеп ашқан. Бірақ бес минуттан соң Иско таразы басын теңестірді. Марокколық футболшылар бұл голдан соң салы суға кетпей, матч аяғында есепте тағы да алға шыққан. Енді топтан бірінші орынмен шығу үшін испаниялықтарға тағы да гол соғуға тура келді.
Ойынның қосымша уақытында Яго Аспас қанжығасын майлап, матч нүктесін қойды – 2:2.
Осылайша, Испания құрамасы топта 5 ұпай жинап, плэй-оффқа бірінші орынмен шықты. Енді 1/8 финалда испаниялықтар Ресей құрамасымен кездеседі.
Еске сала кетейік, Уругвай құрамасы соңғы ойында Ресейді 3:0 есебімен ойсырата ұтып, топта бірінші орын алды.
Мақаланың түпнұсқасы: https://kaz.nur.kz/sport/football/1739058-c-2018-urugvajdan-ojsyraj-tylgan-resej-18-finalda-ispaniamen-kezdesetin-boldy/
