Ресейде күзетші науқасты ауруханаға кіргізбей, аязда жерге жатқызып қойған

Ресейдің Петрозаводск қаласында жедел жәрдем көлігі әкелген науқасты мекеме күзетшісі ішке кіргізбей, баспалдақтан түсіріп, суық далада жатқызып қойған. Күзетшіге ер адамның қаңғыбас болғаны ұнамаған деп хабарлайды life.ru-ға сілтеме жасаған NUR.KZ.

"Кіріп, күзетшіге "Кіре берісте адам жатыр", - дедім. Ол болса: "Ол саған қажет пе? Қажет болса, өзің алып кет. Бізге керек емес", - деп жауап берді", - дейді куәгер.

Оқиғаны көрген басқа да куәгерлер күзетшінің жедел жәрдем алып келген науқасты қолтықтап, далаға шығарып жібергенін растады.

"Керек емес дегенді қалай түсінуге болады? Ол сіздердің мекемелеріңіздің алдында жатыр ғой", - дегенімде, күзетші: "Иә, керек емес, Өлсе, мәйітханаға апарып тастаймыз, ештеңе етпейді", - деп жауап қатты дейді оқиғаны видеоға түсірген ер адам.

Куәгер полиция шақыртқан. Оқиға орнына келген тәртіп сақшылары бәрінен жауап алып, мән-жайды анықтауға уәде берген.