Қазақстандықтардың жалақысы 1 маусымнан бастап көтеріледі

Мәжіліс депутаттары 2019-2021 жылдарға арналған үш жылдық бюджетке түзетулер қабылдады. Құжат азаматтық және мемлекеттік қызметкерлердің жекелеген санаттарына жалақыны арттыруды 1 шілдеден 1 маусымға ауыстыру мәселелесін қарастырады деп хабарлайды KAZ.NUR.KZ.

Осы мақсаттарға арналған республикалық бюджеттің шығындарын 38 млрд теңгеге ұлғайту ұсынылып отыр.

Олардың 37 млрд теңгесі азаматтардың жекелеген санаттары үшін (жалақысы төмен қызметкерлер) 1 маусымнан бастап жалақыны арттыруға бөлінді. Қалған 1 млрд теңге жаңа мемлекеттік орган – Тұңғыш Президент Нұрсұлтан Назарбаевтың кеңсесін құруға бағытталмақ.

Бұған дейін Қазақстан президенті Қасым-Жомарт Тоқаев 1 шілдеден бастап бюджеттік саладағы жалақысы төмен қызметкерлердің айлығын 30% - ға арттыруды тапсырған.

Құжат мемлекет басшысына қол қоюға жіберілді.