RU

Таразда 5 қабатты тұрғын үй өртеніп, 170-тен аса адам қауіпсіз жерге шығарылды

Таразда бес қабатты тұрғын үйден өрт шығып, тілсіз жау бүкіл шатырды қамтыған деп хабарлайды ҚР ІІМ ТЖК баспасөз қызметіне сілтеме жасаған KAZ.NUR.KZ.

Көрнекі фото: kp.kz
Көрнекі фото: kp.kz: Facebook

Комитеттің хабарлауынша, №5 ықшам ауданда орналасқан тұрғын үйдегі өрт 30 мамыр күні сағат 19:34-те басталған.

Оқиға орнына 19:38 өрт сөндірушілердің алғашқы тобы келіп жеткенде тұрғын үйдің шатыры жанып жатқан.

Өрт сөндірушілер ең алдымен көп қабатты үйдегі 171 адамды қауіпсіз жерге шығарған. Оның ішінде 42-і бала болған. Сонымен қатар тағы 20 адам құтқарылған. Оның бесеуі бала.

"Шатырдағы өрттің пәтерлерге ойысу қаупі сақталғандықтан 19:55 минутта өртке жоғарғы үшінші ранг тартылды. Өртті сөндіру үшін үш бөлімше, пәтер тұрғындарын тіркеу үшін жедел топ ұйымдастырылды", - деп хабардар етті ТЖК.

Жалпы өрттің ошағын сөндіруге жеке құрамнан 62 адам мен ТЖД-нің 17 бірлік техникасы жұмылдырылған.

Қолданылған шаралардың арқасында 20:50-де 1200 шаршы метр аумақтағы өрт ауыздықтылған. 22:11-де сөндірілген.

Мақаланың түпнұсқасы: https://kaz.nur.kz/1796931-tarazda-5-kabatty-trgyn-j-rtenip-170-adam-kauipsiz-zerge-sygaryldy.html