Венсан Кассельдің енесі бұрынғы әйелі Моника Белуччидің көшірмесі болып шықты

Венсан Кассельдің қазіргі енесі оның бұрынғы жары Моника Белуччиден айнымайтын болып шықты. Әйгілі актер бұрынғы әйелінің егізіндей келіншектің күйеубаласы атанған деп жазады woman.ru сайтына сілтеме жасаған KAZ.NUR.KZ.

Танымал актриса мен оның бұрынғы күйеуінің енесі өзара қатты ұқсайтыны желіде жарияланған суреттен кейін қызу талқыланған.

Венсан Кассельдің сүйіктісі Тина Кунаки өзінің Instagram парақшасына анасының суретін жүктеп, жұртты таңғалдырған.

Желі қолданушылары Надя Кунакидің италиялық актриса Моника Белуччиге қатты ұқсайтынын бірауыздан жарыса жазды.

Көпшілік Венсан Кассельдің бұрынғы сүйіктісінен айнымайтын әйелдің қызын жар етіп алғанына таңданды.

"Мәссаған, Мониканың көшірмесі ғой", "Мониканың егізі" , "Өмір деген қызық. Айналып келіп, Моникадан айнымайтын келіншектің қызына үйленген" , "Екеуі егіздердей" , - деп жазуда желідегілер.

Айта кетейік, Тина Кунаки мен Венсан Кассель осы жылдың тоғызыншы сәуірінде қызды болды. Ерлі-зайыптылар перзентіне Амазони деп ат қойған.

Бұған дейін танымал актер әйгілі Моника Белуччидің күйеуі болған. Италиялық жұлдыз Кассельге екі қыз туып берген.