"Қайталанбас тұлға": Алматылықтар Денис Тен қаза тапқан орынға гүл шоқтарын апарды

Бүгін еліміздің ұлы спортшысы Денис Тен тірі болғанда 26 жасқа толатын еді. Мәнерлеп сырғанаушының өлімінен кейін бір жылға жуық уақыт өтсе де, оңтүстік астана тұрғындары күллі әлемді дүрсілкіндірген қаралы күнді әлі ұмытар емес. Алматылықтар спортшыны құметпен еске алып, ол қаза тапқан орынға гүл шоқтарын апаруда деп жазады KAZ.NUR.KZ.

Алматы тұрғындары таңертеннен бастап, спортшыны өлтіріп кеткен аулаға гүл шоқтарын апарып жатыр. Барлығының жүзінде мұң, қайғы және спортшыға дегнен сағыныш.

"Мен Денистің қаза тапқан орнынан оны құрметпен еске алу үшін келдім. Меніңше, мұндай ұлы спортшы туралы тек қазақстандықтар ғана емес, күллі әлем жұртшылығы білу керек. Оның өмірден тым ерте кеткені өкінішіті-ақ. Ол әлі талай шыңдарды бағындыратын еді" , - деді Марина есімді ару.

Бойжеткеннің сөзінше, ол журналист мамандығы бойынша білім алып жатыр. Оның үстіне, ол бір жыл бұрын спортшыдан сұхбат алуға дайындалған. Марина тіпті, алдын ала дайындаған сұрақтары жазылған дәптершесін сақтап қойған.

"Оның өлімінен екі ай бұрын мен сұхбатқа дайындала бастадым. Сұрақтарды құрастырдым. Бірақ, үлгермей қалдым" , - деді ару.

Мәнерлеп сырғанаушыны еске алып келген көпшілік оның нағыз үлгі тұтар тұлға болғанын айтуда.

Сонымен қатар, KAZ.NUR.KZ тілшілері балабақшада Денис Теннің тәрбиешісі болған әйелдің немересіне тап болды.

"Біз таныс емеспіз. Бірақ, менің апам Денис барған балабақшада қызмет етті. Әжем ол басқа топқа өтпес бұрын, оны тәрбиелеп бақты.

Ол туралы ешкім және ешқашан жаман нәрсе айтпаған. Көпшілік оны өмірді қатты жақсы көрген адам ретінде білді. Қайғыға ортақпыз. Ұлы әрі қайталанбас тұлға кетті бізден" , - деді Ирина есімді қыз.