Арыстағы жарылыс: Зардап шеккендердің саны 52-ге дейін өсті

Арыстағы жарылыстың салдарынан бір адам қаза тауып, 52 адам жарақат алды. Мұндай ақпарат 24 маусым күні сағат 20-ға берілді деп хабарлайды Zakon.kz-ке сілтеме жасаған KAZ.NUR.KZ.

Түркістан, Кентау, Шымкент, Арыс және Ордабасы аудандарынан 22 жедел жәрдем бригадасы жұмыс істейтіні хабарланды.

Сонымен қатар, зардап шеккендерге травматологтар, реаниматологтар, комбустиологтардан тұратын 2 мультидисциплинарлық бригада көмек көрсетеді.

Көрші Жамбыл және Қызылорда облыстарынан 16 жедел жәрдем бригадасы кез келген уақытта көмекке келуге дайын.

Сондай-ақ, дәрігерлер бригадасымен санитарлық авиацияның 2 тікұшағы дайындалды.

Қазір ауруханаларда 34 зардап шеккен адам бар, оның 2-уі ауыр халде.

Бір адам қаза тапты.

Бұған дейін 46 зардап шеккен адам туралы хабарланған болатын, оның 5-уі-балалар.