Сапарбаев көпбалалы аналарды іскер әйелдерден үлгі алуға шақырды (фото)

Нұр-Сұлтанда елдің барлық өңірінен жиналған көпбалалы аналарға қолданбалы өнер үйретіле бастады. "Асыл ана" әлеуметтік жобасы аясында "Көрпе Fest" мега-фестивалі өтіп жатыр деп хабарлайды KAZ.NUR.KZ тілшісі.

Шараға Еңбек және халықты әлеуметтік қорғау министрі Бердібек Сапарбаев пен Нұр-Сұлтан басшысы Алтай Көлгінов қатысты.

Мұнда тігін және қолданбалы өнер тренинг-семинарларынан өткен қатысушылар өз жұмыстарын ұсынды. Көрме жеңімпаздары дипломдармен, тігін машиналарымен және басқа да бағалы сыйлықтармен марапатталды.

"Табысы төмен көпбалалы аналар өз кәсібін ашып, оны табыс көзіне айналдырған еліміздің іскер әйелдерінен үлгі алуы керек. Өйткені, бұл тек өмір сүру сапасын жақсартуға ғана емес, сондай-ақ өздері сияқты азаматшалар үшін жұмыс орындарын құруға мүмкіндік береді", - деді Бердібек Сапарбаев.

Министр "Еңбек" Мемлекеттік бағдарламасы аясында жаңа бизнес-идеяларын жүзеге асыру үшін көпбалалы ауыл тұрғындарына 505 мың теңгеге дейін гранттар қарастырылғанын атап өтті.

"Мәселен, көпбалалы отбасы тігін машинасын және қажетті материалдарды сатып алуға берілген қаражатты пайдалананып, төсек-орын, ұлттық киім және басқа да бұйымдарды үй жағдайында тігуге мүмкіндік алады", - деп атап өтті министр.

Сондай-ақ көпбалалы отбасылар, мүгедектігі бар азаматтар мен жастар үшін 5 мың жеңілдетілген микрокредит беруге квота қарастырылған. Осының нәтижесінде биыл 15 мың көпбалалы отбасы өз ісін ашып, табысын арттыруға мүмкіндік алады.

Жобаның негізгі мақсаттарының бірі - көпбалалы аналарды оқыту мен ұлттық брендті дамыту арқылы шағын және орта бизнеске тарту.