RU

Батыр Жүкембаев "Канеломен" екі рет кездескен бұрынғы әлем чемпионына қарсы тұрмақ

Кәсіпқой бокста бірінші жартылай орта салмақта өнер көрсететін Батыр Жүкембаев келесі жекпе-жегін 26 қыркүйекте Канаданың Монреаль қаласында өткізеді. Оның қарсыласы бұрынғы әлем чемпионы Мигель Васкес болды деп хабарлайды KAZ.NUR.KZ.

Бұл туралы спортшы Instagram желісіндегі парақшасында жазды.

"Менің келесі жекпе-жегім 26 қыркүйекте болады. Экс-чемпионмен өтетін айқас - мен үшін үлкен сынақ! Алла қаласа әлем чемпионы атану дейтін ұлы мақсатыма бір табан жақындай түсемін. Қазақ елінің намысы маған күш-қуат сыйлайды! Қолдауларыңызға рахмет!" , - деді Жүкембаев.

Боксшының сөзінше, қарсыласы Мигель Васкес IBF нұсқасы бойынша әлем чемпионы болған.

Жүкембаев 49 кездесуге шығып, соның 41-ін жеңіспен аяқтаған спортшымен жұдырықтасу қиын екенін жасырмады.

Ол қарсыласының мексикалық Сауль Альвареспен екі рет жекпе-жекке шыққанын да атап өтті.

Айта кетейік, Батыр Жүкембаев кәсіпкой бокста 16 кездесуге шығып, барлығында жеңіске жеткен. Боксшы 13 кездесуді мерзімінен бұрын аяқтаған.

Сондай-ақ, жеңіліп көрмеген спортшы 14 шілде күні шаңырақ көтерді.

Мақаланың түпнұсқасы: https://kaz.nur.kz/1808700-alvarespen-eki-ret-kezdesken-zkembaev-bryngy-lem-cempionymen-zdyryktasady.html