"Қылмыстық іс қозғалды": Сағынтаев Алматыдағы өртке қатысты пікір білдірді

Алматы әкімі Бақытжан Сағынтаев Көк-Төбе тауының оңтүстік-батыс баурайында болған өртке қатысты пікір білдірді. Оңтүстік астананың басшысы күні кеше оқиға орнына өзі барып, мән-жаймен танысқан деп хабарлайды әкімнің Instagram парақшасына сілтеме жасаған KAZ.NUR.KZ.

Сағынтаевтың сөзінше, жағдай бақылауда, қалаға қауіп төніп тұрған жоқ. 10 гектар аумақтағы өрт ауыздықталған.

Тілсіз жаумен күрекске ТЖД-ның жеке құрамының және коммуналдық қызметтердің 1500-ден астам қызметкері, 70 арнайы техника жұмылдырылған.

Сондай-ақ, шенеунік оқиға жайында ІІМ және Қорғаныс министрлерімен сөйлескенін атап өтті.

"Өртке қарсы қызмет күші қарауылдау режиміне өттi. Өрттің себебін анықтау үшін қылмыстық іс қозғалады", - дейді Алматы әкімі.

Сонымен қатар Сағынтаев өрт сөндіруге қатысып, ерлік танытып, тілсіз жауды қалаға таратуға жол бермегендерге алғыс айтты.

Еске сала кетейік 11 тамызда Алматыда Көк-Төбе телемұнарасына жақын жерде өрт шыққаны жайлы хабарланған еді.

Қызыл жалынды ауыздықтауға екі тікұшақ жіберілген.