Қарағандыда Шахтерлер күніне қызу дайындық жүруде

Кеншілер астанасында жылдағы басты мерекелердің бірі - тамыздың соңғы жексенбісінде аталып өтетін Шахтерлер күніне дайындық жүруде. Биыл кеншілердің кәсіби мерекесі 25 тамызға тұспа-тұс келмек, ал мерекені тамыздың 23-нен бастап атап өту жоспарлануда.

Қарағандыда Шахтерлер күні 3 күн бойы тойланады. 23 тамызда Орталық мәдениет және демалыс саябағында "Art El" музыкалық артелінің қатысуымен "Jooma Kesh" музыкалық кеші өтеді. Іс-шараны Қарағанды қаласының әкімдігі ұйымдастырады.

Келесі күні, 24 тамызда Қазақстанның ірі металлургиялық кәсіпорны және өңірдің басты жұмыс берушілерінің бірі "Арселлор Миталл Теміртау" ЖШС ұйымдастыруымен қала тұрғындарына Орталық саябақтың жағалауында мерекелік бағдарлама өтеді.

Сағат 15-00 - де Облыстық балалар ұжымдарының қатысуымен мерекелік концерт, сағат 17-00 – де - "Шахтер жұлдыздары" конкурстық бағдарламасы және сағат 19-00-де "Голос" балалар жобасының жеңімпазы Ержан Максимнің, аты аңызға айналған "Ялла" тобының және қазақстандық шоу-топтарының қатысуымен "Шахтер даңқы" атты мерекелік концерті басталады.

25 тамыз күні ең асыл және күрделі мамандықтардың бірі – кеншілердің төл мерекесімен құттықтау жалғасады. Түскі сағат 12-00-де қаланың бірнеше алаңында мерекелік концерттер басталады. "Жаңа Майқұдық" Мәдениет үйінде "Кеншілер даңқы", "Теміржолшылар" Мәдениет үйінде "Біз Қарағанды шахтерлерін мақтан тұтамыз!", ал" Молодежный " Мәдениет үйінде - " Ерен еңбеккерлер - Кеншілерге!" атты концерттік бағдарламалар өтеді. Әкімдіктен хабарлағандай, іс-шараларда саланың үздік қызметкерлерін марапаттау рәсімі де өтеді.

25 тамызда сағат 16-00-де Орталық мәдениет және демалыс саябағы жағажайында қарағандылықтар "Jezkiik" Халықаралық этномәдени мұра фестиваліне қатысушылардың концертіне, ал сағат 18-00 – де "Молодые годы Караганды" ретро-концертіне қатыса алады. Дәстүр бойынша мерекелік іс-шараның шарықтау шегі – отшашу сағат 23-00-де басталады.