Алматыдағы арнайы операция кезінде қала тұрғынынан қару-жарақ арсеналы тәркіленді (фото)

Полицейлер Алматыдағы Медеу ауданында атыс қаруларын заңсыз айналымнан шығару бойынша арнайы операция жүргізді деп хабарлайды жергілікті полиция департаментінің баспасөз қызметіне сілтеме жасаған KAZ.NUR.KZ.

"Думан" шағын ауданында тұратын, бұған дейін ақша бопсалағаны үшін сотталған 1992 жылғы азамат Т. көзге түсті. Ұстау кезінде жеке тексеру жүргізіліп, одан пышақ табылды. Ал оның "Ауди" маркалы автокөлігін тексеру кезінде 12 калибрлік екі аңшылық шолақ мылтық, карабин, тегіс ұңғылы мылтық, сондай-ақ 15 оқ-дәрі табылып, тәркіленді.

Тәркіленген қарудың барлығы сот-баллистикалық сараптамаға жіберілді. Сараптама зерттеулерінен кейін олардың қайдан шыққаны, кімге тиесілі екені және қандай да бір қылмыс кезінде пайдаланылғаны немесе пайдаланылмағаны белгілі болады", – деп мәлімдеді Алматы қаласы полиция департаменті қылмыстық полиция басқармасының басшысы, полквник Жанболат Зиадин.

Қазіргі уақытта қалалық полиция департаментінің тергеу басқармасы ҚР ҚК-нің 287 бабы, 3-бөлігінде қарастырылған қылмыс белгілері бойынша аталған фактіге қатысты тергеу жүргізуде.

Ұсталған азамат уақытша ұстау изоляторына қамалды.