23:00-ден кейін балконда ән салғандар енді жауапкершілікке тартылатын болады

Бүгін Орталық коммуникациялар қызметіндегі онлайн-брифингте Нұр-Сұлтан қалалық полиция департаментінің басшысы Ержан Сәденов бұдан былай балконда ән айтып, 23:00-ден кейін тыныштықты бұзғандардың жауапкершілікке тартылатынын айтты деп хабарлайды KAZ.NUR.KZ ҚазАқпаратқа сілтеме жасап.

Сәденовтің мәліметінше, кешкі және түнгі уақытта тыныштықты бұзу көбейген.

"Карантин кезінде үйде отыру қиын екенін түсінеміз. Сонда да сіздерден 23.00-ден кейін тыныштық сақтауды сұраймын. Мұның терезеден және балконнан ән айтуға да қатысы бар.

Тыныштық бұзғандар әкімшілік жауапкершілікке тартылатындығын ескертемін. Осы мүмкіндікті пайдаланып, сіздерден үйде болуларыңызды, заңға бағынуды және ресми ақпараттарға ғана сенуді өтінемін", - деді департамент басшысы.

Сондай-ақ, Сәденов медициналық масканы тағып жүрудің маңызды екенін атап өтті. Оның сөзінше, карантин режимінің нормасын сақтамай маска тақпаған адам жауапкершілікке тартылады.

"Қазіргі кезде медициналық масканы тағу-тақпауға қатысты сұрақ көп. Масканы тағу керек. Өйткені, сіз вирустық инфекцияны тасымалдап немесе жұқтырып алуыңыз мүмкін.

Егер адам ауырғанын біле тұра маска тақпаса, онда бұл қылмыстық жауапкершілік болатындығын ескертемін. Сол себепті полиция масканы міндетті түрде тағуға кеңес береді. Бұл - карантин режимінің нормасы", - дейді ол.

Сонымен қатар департамент басшысы үйдегі балалардың қауіпсіздігіне аса назар аударуды сұрады.

Оның айтуынша, Төтенше жағдай кезінде екі бала терезеден құлап, өкінішке қарай, оның бірі мерт болған.

Ең маңызды әрі қызықты жаңалықтарды біздің Instagram парақшамыздан оқыңыздар>>