Назарбаев Университетінің президенті Елбасына хат жазды

Jysan компаниялар тобының директорлар кеңесінің төрағасы - Назарбаев Университетінің президенті Шигео Катсу Елбасына хат жазды. Хатында ол Нұрсұлтан Назарбаевқа тезірек сауығып кетуін тіледі деп хабарлайды KAZ.NUR.KZ.

"Құрметті Нұрсұлтан Әбішұлы!

Жеке өз атымнан және Jysan компаниялар тобының ұжымы атынан сіздің денсаулығыңыз үшін алаңдаулы екенімді жеткізіп, тезірек сауығып кетуіңізді шын көңілмен тілеймін.

Өкінішке қарай, COVID-19 пандемиясы дүние жүзіне қауіпті екенін байқатты. Қанша сақтансақ та, бұл індет Қазақстанда айналып өтпеді. Дегенмен, осы қиындықты да елімізбен бірге міндетті түрде еңсеріп шығамыз.

Орын алған жағдайға қарамастан, еліміздің бүгіні мен ертеңі үшін еңбегіңізді аямай, жұмысыңызды әрі жалғастырып жатқаныңыз - нағыз ерлік деп білеміз.

Қазақстан халқын талай қиындықтан алып шыққан және бір шаңырақ астына жинаған сіздің қайсар болмысыңыз бен күш-жігеріңіз бұл сынақты да оңай еңсеруге көмектеседі деген сенімдеміз.

Шын көңілден деніңізге саулық, қажымас күш-қуат, ұзақ ғұмыр тілейміз.

Біз сізбен біргеміз, халқыңыз сізбен қашан да бірге!" - делінген хатта.

Еске сала кетсек, кеше Қазақстанның тұңғыш президентінен коронавирус инфекциясы анықталғанын жазған болатынбыз.