RU

Алексей Цой денсаулық сақтау бірінші вице-министрі болды

Үкімет қаулысымен Алексей Цой денсаулық сақтау министрінің бірінші орынбасары қызметіне тағайындалды деп хабарлайды KAZ.NUR.KZ премьер-министрдің ресми сайтына сілтеме жасап.

Фото: primeminister.kz
Фото: primeminister.kz: UGC

Асқар Мамин денсаулық сақтау министрлігінің ұжымына ведомство басшысының бірінші орынбасары Алексей Цойды таныстырды.

Үкімет басшысы Цойдың медицина және басқару саласындағы үлкен жұмыс тәжірибесін атап өтті. Ол министр Елжан Біртанов коронавирустан емделіп шыққанша денсаулық сақтау министрінің міндетін атқаратын болады.

Мамин коронавирус пандемиясымен күрес жағдайында халық денсаулығын сақтау бойынша денсаулық сақтау жүйесінің алдында тұрған міндеттерді шешудің маңыздылығын атап өтті.

Алексей Владимирович Цой 1977 жылы 2 сәуірде Оңтүстік Қазақстан облысында дүниеге келген. Sells College (Лондон), Қазақстан мемлекеттік медицина академиясының аспирантурасын, Оңтүстік Қазақстан мемлекеттік медицина академиясын, «Дәнекер» халықаралық құқық және халықаралық бизнес институтын, РФ Президенті жанындағы Ресей халық шаруашылығы және мемлекеттік қызмет академиясының корпоративтік басқару жоғары мектебін тәмамдаған. Стэнфорд университетінде (АҚШ), Сингапурда, Мәскеуде, Германияда, Ұлыбританияда және т. б. елдерде тағылымдамадан өткен. Іскерлік әкімшілік докторы, медицина ғылымдарының кандидаты.

Хирург-эндоскопист болып жұмыс істеген, Қалпына келтіру хирургиясы және трансплантология орталығының аға ғылыми қызметкері, Ұлттық ғылыми медицина орталығының ішкі медицина орталығының жетекші ғылыми қызметкері, «Еуроазиаттық респираторлық қоғам» қоғамдық бірлестігінің бас хатшысы, ҚР Президенті Іс басқармасының Заманауи медициналық технологияларды енгізу орталығының директоры, ҚР Президенті Іс басқармасының Медициналық орталығының басшысы, Астана қаласының №1 қалалық ауруханасының бас дәрігері, ҚР денсаулық сақтау және әлеуметтік даму вице-министрі, ҚР денсаулық сақтау вице-министрі қызметтерін атқарған.

2019 жылғы ақпаннан бастап осы уақытқа дейін Қазақстан Республикасы Президенті Іс басқармасының Медициналық орталығын басқарды.

Айта кетейік, бұған дейін коронавирус жұқтырған денсаулық сақтау министрі Елжан Біртановтың қазіргі жағдайы туралы жазған болатынбыз.

Мақаланың түпнұсқасы: https://kaz.nur.kz/1861585-aleksej-coj-densaulyk-saktau-birinsi-vice-ministri-boldy.html