RU

Антикор "СҚ-Фармация" мен медсақтандыру қорындағы жемқорлық фактілерін тексере бастады

Сыбайлас жемқорлыққа қарсы қызмет шетелдік гуманитарлық көмекті таратуды және МӘСҚ қаражатын жымқыру фактісін тексеруде деп хабарлайды KAZ.NUR.KZ ҚазАқпарат агенттігіне сілтеме жасап.

Антикор "СҚ-Фармация" мен медсақтандыру қорындағы жемқорлық фактілерін тексере бастады
Көрнекі фото: NUR.KZ: Original

Агенттік мемлекет басшысының тапсырмасын орындау мақсатында мүдделі мемлекеттік органдардың өкілдерін, жұртшылық пен сарапшыларды тарта отырып, мемлекеттік сегменттегі дәрі-дәрмектердің, медициналық техника мен медициналық бұйымдардың бірыңғай дистрибьюторы - "СҚ-Фармация" ЖШС қызметіндегі сыбайлас жемқорлық тәуекелдерін сыртқы талдауды бастады.

"Талдау барысында компания қызметінің ұйымдастыру-басқару қызметі мен нормативтік-құқықтық базасы жан-жақты зерделенеді. Нәтиже бойынша оның қызметінің тиімділігін арттыру, ұйымдастыру құрылымын оңтайландыру, бизнес-процестерді трансформациялау, әкімшілік шығындарды қысқарту, мемлекеттік сатып алуды тиімді ету және сыбайлас жемқорлық тәуекелдерін жою бойынша нақты ұсыныстар енгізіледі",- делінген хабарламада.

Компания басшылығы мен қызметкерлері тарапынан анықталған құқық бұзу фактілері бойынша процессуалдық шешім қабылданады. Сонымен қатар, агенттік жұртшылықпен бірлесіп COVID-19-бен күреске бағытталған шетелдік гуманитарлық көмекті таратуды тексеруде.

"Сондай-ақ, Сыбайлас қызметтің сатып алынатын қызметтердің бағасын асыра көтеру арқылы "Медициналық әлеуметтік сақтандыру қоры" КЕАҚ қаражатын жымқыру фактісі бойынша сотқа дейінгі тергеу бастағанын хабарлаймыз. Бұл бағыттағы жұмыс жалғасуда", - деп мәлім етті агенттіктен.

Айта кетейік, осыған дейін үкіметтің кеңейтілген отырысында мемлекет басшысы "СҚ-Фармация" қызметін жемқорлық тұрғысынан тексеруді тапсырған еді.

Мақаланың түпнұсқасы: https://kaz.nur.kz/1864721-antikor-sk-farmacia-men-medsaktandyru-koryndagy-zemkorlyk-faktilerin-teksere-bastady.html