RU

"Заң бұзушылық": ІІМ Қуат Хамитовтың ұсталуына қатысты пікір білдірді

Фото
Фото: Қуат Найманның әлеуметтік желідегі парақшасы

Ішкі істер министрлігі атақты спортшы, аралас жекпе-жек шебері Қуат Хамитовтың ұсталуына байланысты пікір білдірді деп хабарлайды KAZ.NUR.KZ порталы.

Бұл туралы ведомствоның ресми өкілі Нұрділдә Ораз онлайн брифинг барысында айтты.

"Бұл азамат әлеуметтік желі арқылы азаматтарды заңсыз әрекеттерге үндейтін видео жариялаған. Бұл - тікелей заң бұзушылық. Мұндай әрекеттерге қылмыстық жауапкершілік қарастырылған. Ішкі істер министрлігі жалған ақпараттарды таратпауға және ресми дереккөзге сенуге шақырады", - деді ол.

Ал спортшының өзі әлеуметтік желісіндегі парақшасында бұл жағдайдан кейін алғаш рет жазба қалдырды.

"Біз үшін отан мен халық бірінші орында болуы керек", - деді Хамитов Instagram парақшасында.

Естеріңізге сала кетейік, осыған дейін Алматы полициясы қазақстандық спортшы Қуат Найманды қамауға алғанын жазған едік.

ПД ресми өкілі Салтанат Әзірбектің айтуынша, азамат Хамитовтың қатысуымен түсірілген видео зорлық-зомбылыққа шақырған.

Факт еліміздің Қылмыстық кодексінің 272 бабы бойынша сотқа дейінгі тергеудің бірыңғай тізіліміне алынған. Спортшы тиісті процесуалдық шараларды жүргізу үшін Алматы қаласы полиция департаментіне жеткізілген.

"Қылмыстық іс бойынша тергеу шаралар кешенінің нәтижелері бойынша соңғы процессуалдық шешім қабылданады. Оның іс-әрекеттеріне принципиалды түрде баға беріледі", - деді Алматы қаласы ПД баспасөз қызметі.

Мақаланың түпнұсқасы: https://kaz.nur.kz/1874349-za-bzusylyk-iim-kuat-hamitovty-staluyna-katysty-pikir-bildirdi.html