RU

Тоқаев Мусинге бірқатар тапсырмалар берді

Тоқаев пен Мусин
Фото: Akorda.kz

Қазақстан Президенті Қасым-Жомарт Тоқаев цифрлық даму, инновация және аэроғарыш өнеркәсібі министрі Бағдат Мусинді қабылдады деп хабарлайды KAZ.NUR.KZ Ақорданың ресми сайтына сілтеме жасап.

Президентке интернет байланысының, әсіресе, ауылдық жерлердегі сапасы мен қолжетімділігін арттыру, «Цифрлық Қазақстан» мемлекеттік бағдарламасын трансформациялау, сондай-ақ, мемлекеттік қызметті онлайн форматқа көшіру жұмыстары туралы министрліктің есебі берілді.

Қасым-Жомарт Тоқаевқа инновациялық экожүйені қалыптастыру жолдары, аэроғарыш саласын дамыту, сонымен қатар, экспортқа шығарылатын бәсекеге қабілетті өнім әзірлеу үшін IT саласы бойынша кәсіби мамандар даярлау жоспары жөнінде баяндалды.

Мемлекет басшысы білім беру платформасын дамытудың, қашықтан білім беру үдерісіне техникалық тұрғыдан көмек көрсетудің, мемлекеттік қаржылай қолдау шараларын электронды оқулықтар мен цифрлық білім беру ресурстарын дамытуға бағыттаудың маңыздылығын атап өтті.

Сонымен қатар Қасым-Жомарт Тоқаев Бағдат Мусинге мемлекеттік қызметті пайдалану кезінде биометрия тетіктерін енгізу, цифрландыруды басқару жүйесіне реформа жүргізу, «Зерде» холдингінің рөлі мен жауапкершілігін арттыру  жөнінде бірқатар міндет жүктеді. Мемлекет басшысы радиотолқындарды бөлудің ашық тетіктерін енгізуді тапсырды. 

Естеріңізге сала кетейік, Тоқаев Эмонали Рахмонға қоңырау шалып, туған күнімен құттықтады.

Оған қоса, Қасым-Жомарт Тоқаев АҚШ президенті Дональд Трамп пен оның жұбайы Меланияның коронавирустан тезірек сауығып кетуіне тілектестік білдірген болатын.

Мақаланың түпнұсқасы: https://kaz.nur.kz/1877927-tokaev-musinge-birkatar-tapsyrmalar-berdi.html