RU

Ішкі істер министрлігі пәтерін жалға беретіндерге ескерту жасады

пәтер кілт1
Көрнекі фото: pixabay.com

Ішкі істер министрлігі пәтерді жалға беретін адамдарға ескерту жасады. Ведомствоның айтуынша, шетел азаматы жалға алған пәтерінде есірткі зертханасын ашқан деп хабарлайды KAZ.NUR.KZ Sputnik Қазақстанға сілтеме жасап.

Есірткі қылмысына қарсы іс-қимыл департаментінің басқарма басшысы Бақытжан Әмірхановтың айтуынша, Қарағанды облысында синтетикалық есірткі жасаған шетел азаматы ұсталды.

Ол көрші елден келіп, тұруға ықтияр хат алған. Одан кейін жалға алған жеке меншік үйде есірткі жасау зертханасын ашып алған.

"Оны ұстау кезінде 750 грамм дайын синтетикалық есірткі тәркіленді. Соның бәрін құпия жерде тығып, ірі партиямен сатпақшы болған. Ал тұрғылықты жерін тінту кезінде химиялық сұйықтық, канистрлер, сондай-ақ, барлық қажетті құрал-жабдықтар табылды", – дейді Әмірханов онлайн брифингте.

Қазіргі кезде тергеу шаралары жүргізілуде. Осы қылмысқа басқа адамдардың қатысты бар ма, жоқ па, соның бәрі тексеріліп жатыр. Күдіктінің өзі кінәсін мойындаған. Тәркіленген есірткінің жалпы салмағы 5-6 келіні құрап отыр.

"Осы есірткінің бір грамы 15 000 теңге тұрады. Сонда тәркіленген заттың жалпы құны, шамамен 76 миллион теңгені құрайды. Бұл – ірі партия. Осы орайда ел азаматтарына ескерту жасап кеткен жөн. Жеке меншік үйлер мен пәтерлерді жалға бергенде күдік туғызатын заттар мен құрал-жабдықтарды байқасаңыздар, бірден полицияға хабар беріңіздер", – деп атап өтті Әмірханов.

Еске сала кетсек, бұған дейін Ақтөбеде есірткі пайдаланып, көлік айдаған жүргізушінің ұсталғанын хабарлаған едік.

Мақаланың түпнұсқасы: https://kaz.nur.kz/1879094-iski-ister-ministrligi-pterin-zalga-beretinderge-eskertu-zasady.html