RU

Президент Маминге эпидемиологиялық ахуалды қатаң бақылауға алуды тапсырды

Алаяқ1
Фото: Ақорда

Мемлекет басшысы Қасым-Жомарт Тоқаев премьер-министр Асқар Маминді қабылдады деп хабарлайды KAZ.NUR.KZ порталы Ақорданың ресми сайтына сілтеме жасап.

Кездесу барысында президентке биылғы 9 ай ішіндегі еліміздің әлеуметтік-экономикалық даму қорытындылары жөнінде есеп берілген.

Қасым-Жомарт Тоқаевқа бірқатар салада дамудың оң қарқыны байқалатыны баяндалды.

Атап айтқанда өңдеу өнеркәсібінің өсімі 3,3%-ға жеткен, құрылыс көлемі 10,5%-ға, тұрғын үйлердің пайдалануға берілуі 9%-ға немесе шамамен 9,6 миллион шаршы метрге артқан. Ауыл шаруашылығындағы өсім көрсеткіші 5%-ды құрады. Қазақстанның алтын-валюта қоры мен Ұлттық қор активтері 1 қазандағы мәлімет бойынша 91,1 миллиард долларға жеткен.

Үкімет басшысының айтуынша, қыркүйекте қызмет көрсету саласындағы белсенділікті қайта қалпына келтіру жұмыстары басталды. Осы ретте тамыз айымен салыстырғанда сауда-саттық 2,7%-ға, байланыс 1,3%-ға, көлік және қойма 1,2%-ға артқан.

Қызмет көрсету секторындағы өсім шағын және орта бизнестің жанданғанын білдіреді. Бұл жаңа жұмыс орындарының ашылуына және азаматтардың әл-ауқатының жақсаруына ықпал етеді.

Сондай-ақ премьер-министр 11-12 қазан күндері Абу-Даби қаласына жасаған жұмыс сапарының қорытындылары туралы есеп берген.

Аталған сапар барысында мемлекет басшысы Қасым-Жомарт Тоқаевтың биылғы қаңтарда Біріккен Араб Әмірліктеріне жасаған ресми сапары кезінде қол жеткізген уағдаластықтардың нақты жүзеге асырылып жатқанына көз жеткізілді. 

Сонымен қатар екі ел үкіметі Инвестициялық ынтымақтастық туралы меморандумға қол қойған. Онда құны 6,1 миллиард доллар болатын 21 жобаны жүзеге асыру көзделген. Аталған құжат жоғары қосымша құны бар және пайдасы мол, сондай-ақ, ішкі нарықта да, сыртқы нарықта да үлкен сұранысқа ие болатын өндіріс орындарын ашуға бағытталған.

Мемлекет басшысы экономиканы дамытудың оң қарқынын қамтамасыз ету жөніндегі үкіметтің атқарған іс-қимылдарын атап өтіп, азаматтарымыздың денсаулығына, шағын және орта бизнестің жұмысына, сондай-ақ, жалпы экономиканың дамуына шетелде кең тараған коронавирус індетінің кері әсерін болдырмау үшін премьер-министрге еліміздегі эпидемиологиялық ахуалды қатаң бақылауға алуды тапсырды.

Еске салсақ, Қасым-Жомарт Тоқаев сайлауда жеңген Тәжікстан перзидентін телефон арқылы құттықтады.

Сондай-ақ, Қазақстан, Тәжікстан, Түрікменстан және Өзбекстан республикасының президенттері Қырғызстандағы ахуалға байланысты бірлескен мәлімдеме жасады.

Мақаланың түпнұсқасы: https://kaz.nur.kz/1879377-prezident-maminge-elimizdegi-epidemiologialyk-ahualdy-kata-bakylauga-aludy-tapsyrdy.html