RU

Назира Байырбек: "Бораттың қарындасы" дегенге намыстанбаймын

Назира Байырбек әпкелерімен
Фото: Instagram/nazira_bairbek

Отандық танымал журналист Назира Байырбек атышулы "Боратқа" қатысты жазба жариялап, өзін оның қарындасы деп атағаны үшін намыстанбайтынын айтты. Ақпарат өкілінің пікірінше, Борат пен қазақ халқын байланыстарынатын еш нәрсе жоқ. Сол себепті, ол қатысы жоқ дүниеге бола шүйлікпеген жөн екенін алға тартты деп жазады KAZ.NUR.KZ.

Бүгінде АҚШ-та тұрып жатқан Назира Байырбек өзін "Бораттың қарындасы" деп атайтын жағдай болса мүлдем намыстанбайтынын айтты. Оған белгілі журналистің өзіндік себебі де бар болып шықты.

Ол туралы БАҚ өкілі Instagram парақшасында ашып айтты. Назира Байырбек желіде осы тақырып аясында жазба жариялап, қазақты қазақ ретінде таныту кез келген адамның өз қолында екенін ескертті.

"Қазақ деген кім? Қазақ - мен. Қазақ - сіз. Қазақ - біз. Қазақ Борат емес. Түрі де, қылығы да, іс-әрекеті де шындыққа үйлеспейтін, жәй комедия үшін жасалған сол сайқымазақ образ үшін шала бүлінбей-ақ қойған дұрыс-ау.

Шамшылдық - әлсіздік. Мен де бұрын әлсіз болғам. Қазір де мықты боп тұрғаным шамалы ғой, бірақ бұрын өте әлсіз болғам. Біреу қазақты төмендетсе намыстанып, өкпелей беруші ем. Қазір ойлап қарасам, соның бәрі түкке тұрғысыз екен.

Сәл бұрынырақта, рас, шетелде оқып жатқан бір қызға басқа мемлекеттен келген бұзық қыздар “Бораттың қарындасы” деп келемеждеп, түртпектей берген екен. Оған намыстанған қазақ қыз төбелесуге дейін барған. Арты біраз шуға айналған еді. Бұл туралы қазақ “Астана ақшамы” газетіне жазылған болатын. ⠀ Бірақ мен жас қыз емеспін. Содан ба, мұндайға намыстанбайды екем. Намыстанса, еврейлер, немістер, т.б. жайлы да неше түрлі фильмдер бар. Олар неге намыстанбайды? Қысқасы, біз қазақ, әрқайсымыз қазақты танытушылармыз. Менің айналамдағылар қазақ әйелі мен деп ойлайды.

Бидай өңді, қой көзді, орта бойлы, бес баласын жетектеп әлі де арман қуып жүрген, білімге, дамуға сусаған, ешкімге зияным тиіп кетпесе екен деп жүретін, еңбекқор, өзінің ана тілінде сөйлейтін және исламның ішкі құндылықтарын жүрегіне қондырған әйел - қазақ әйелі деп біледі. ⠀ Иә. Елде жүргенде айналамның бәрі қазақ болатын. Біз бәріміз қазақ едік. Ал шетелдіктердің арасында жүргенде қазақ - менмін. Олар қазақты бәрібір маған қарап таниды. Басқалар не істесе де өздері өздері білсін. Біз өзіміз биік қазақ болып қалайықшы. Жарай ма" , - деп жазды ол.

Мақаланың түпнұсқасы: https://kaz.nur.kz/1880517-nazira-bajyrbek-boratty-karyndasy-degenge-namystanbajmyn.html