Атырау перзентханасында тамаққа шашалған жүкті әйел көз жұмды

24 наурызда облыстық перзентханада жүкті әйел қайтыс болды. Алдын ала мәліметтер бойынша, әйел аспирациядан көз жұмған (құсығына шашалып қалған) деп хабарлайды Ақ жайық.

Туыстарының айтуынша, жас әйел Миялы поселкесінің аудандық ауруханасынан Атырауға жіберілген. 24 наурызда сағат 15-ке дейін Гүлжібек туыстарымен телефон арқылы босанатын мерзімі "жақындап қалғанын", бірақ дәрігерлер оны қаладағы туыстарына қолхатпен жіберуге уәде бергенін хабарлаған. Яғни, алаңдайтын еш себеп болмаған.

Ал сағат 16-дан кейін олардың қоңырауларына бөгде әйел жауап беріп, Гүлжібектің қайтыс болғанын хабарлаған. Ресми түрде қайтыс болу себебі туыстарына әзірге хабарланбаған, оларға тек оның тамаққа шашалып қалғанын айтқан.

Марқұмның туыстарын енді, егер бұл жағдай мерекелік демалыс күндері емес, күнделікті күндерде орын алғанда, оны мен сәбиін аман алып қалуға болатын еді деген ой мазалайды. Олардың мәліметінше, сараптама жүргізу үшін тіпті Астанадан сарапшы да шақырған, алайда қорытынды қолдарына әлі тимеген.

"Жергілікті мамандар жүргізетін сот-медициналық сараптама нәтижелері әлі дайын емес. Әйелде сәл жоғары қан қысымынан басқа ерекше патология болмаған. Ол тұрған елді мекеннің шалғайлығын және босанатын уақыты жақындағанын ескеріп, оны бізге перзентханаға дәрігерлердің бақылауында болуға шақырғанбыз. Бұл әдеттегі тәжірибе", - дейді облыстық перзентхананың бас дәрігері Ұлжан Хасанова.

Тіпті демалыс күндері мен мереке күндері де, оның айтуынша, әйелдер медициналық бақылауда болады екен. Сол күні кезекшілікте 10 маман: акушер-гинекологтар, неонатологтар, анестезиологтар мен бас дәрігердің орынбасары болған.

"Ол өз палатасында тамақтанып отырғанда, шамасы, құсқан болуы керек, тамақ тыныс жолдарына түсіп, оны бітеп тастаған. Әйел дем ала алмай, тұншығып қалған. Оны сол сәтте көрген кезекші медбикелер жүгіріп жетіпті. Жансақтау шаралары нәтиже бермеді, баланы да құтқарып қалу мүмкін болмады", - дейді Ұлжан Хасанова.