RU

Қазақстаннан қажылыққа биыл 4 мың мұсылман барады

Мұсылманның бес парызының бірі қажылықты өтеуші отандастарымыздың алды ертең, яғни 11 қыркүйек күні, елден аттанбақ. Қасиетті сапарға биыл Қазақстаннан 4 мың мұсылман барады деп хабарлайды Астана арнасы.

Өткен жылдармен салыстырғанда әуе қатынасы дейді діни басқарма өкілдері. Бүған дейін бірнеше рейспен Сауд Арабиясына жетуге мәжбүр болған отандастарымыз үшін енді тікелей рейс ашылды.

Бұған дейін қазақстандық мұсылмандар қасиетті мекенге Түркия немесе Біріккен Араб Әмірліктері арқылы ұшатын. Биылдан бастап Алматыдан Мәдина мен Джидда қалаларына тікелей әуе қатынасы ашылды. Отандастарымызды бұл сапарға 100-ге жуық имам бастап барады. Олар ниет білдіруші азаматтарға қажылықтың шарттарын түсіндіріп, бастан-аяқ бірге болады. Сауд Арабиясына қалың топпен бірге дәрігерлер де аттанбақ. Олар қажылық барысында азаматтардың денсаулығын қадағалайды.

Меккедегі Әл-Харам мешітінде жөндеу жұмыстары жүріп жатыр. Осыған байланысты Сауд Арабиясы биыл қажылыққа келетіндер санын 20 пайызға қысқартты. Соның өзінде бір миллион адамға шамамен бір мың квотадан келеді. Қазақстанда 10 миллионнан астам мұсылман барын ескерсек, елімізден жыл сайын 10 мыңдай адамның қажылыққа баруға мүмкіндігі бар.

Қазақстан мұсылмандары діни басқармасы қажылық бөлімінің меңгерушісі Қанат Бекжанов "Астана" арнасына берген сұхбатында "Биылдан бастап қажыларымызды Сауд Арабиясының компаниясы отандық авиакомпания «Флайнас» тікелей чартерлік рейсімен тасымалдайды. Бұл небәрі 6 сағатты ғана құрайды. Алматыдан шыққаннан кейін 6 сағат 15 минуттың ішінде Джидда және Мәдина қалаларына жетіп баратын болады. Қайтуы қыркүйек айының 27-сінен басталады. Қазан айының 11-не дейін жалғасады", - дейді.

Мақаланың түпнұсқасы: https://kaz.nur.kz/885953-qazaqstannan-qazhylyqqa-biyl-4-mynh-musy.html