Самара-Шымкент тас жолында көлік апатынан жеті адам тірідей өртеніп кетті

Батыс Қазақстан облысында қос автокөлік өртеніп, 7 адам жанып кетті деп жазады ҚазАқпарат агенттігіне сілтеме жасаған NUR.KZ.

БҚО ТЖ департаментінің баспасөз қызметінен түскен мәліметке қарағанда, 30 шілде күні сағат 03.06-да Самара-Шымкент жолының 318-шақырымында, Сырым ауданы аумағында «ВАЗ-2114» және «ВАЗ-2170» автокөліктері соқтығысқан.

Содан кейін қос көлік толықтай өртеніп кеткен. Оқиға орнына БҚО ТЖ департаментінен 1 қызметкер мен 1 техника, «Өрт сөндіруші» АҚ филиалынан 9 қызметкер және 1 техника барған.

Өрт сөндіріліп, қаза тапқандардың кім екені анықталу үстінде.

БҚО денсаулық сақтау басқармасының баспасөз хатшысының айтуынша, сағат 03.15-те жедел жәрдем шақырылыпты.

Өрт салдарынан қаза тапқан 7 адамның мүрделерін полиция алып кеткен.

БҚО ішкі істер департаментінің баспасөз қызметі болған оқиғаны растап, мәліметті кейін беретіндігін жеткізді.