Ақтөбеде мектеп оқушыларының төбелесінен 15 жастағы бала көз жұмды

Ақтөбе облысында мектеп оқушыларының төбелесінен 15 жастағы бала көз жұмды. Оқиға кеше кешке Шалқар ауданында болған деп хабарлайды NUR.KZ.

Жасөспірімнің кеудесіне өткір зат кіріп кеткен. Төбелес Шалқар қаласындағы №6 жалпы орта білім беру мектебі мен Ідіріс Үргенішбаев атындағы мектеп оқушыларының арасында болған.

10 сынып оқушылары арасындағы жанжалдан 15 жастағы жасөспірім ауыр жарақат алып, көз жұмды. 

"Кеше кешкілік 19:15 шамасындa жеткізілген жасөспірімнің жағдайы өте ауыр болды. Кеуде қуысынан жарақат алып, қан ішіне кетіп қалған. Құтқарып қалу мүмкін болған жоқ. Ол бірден көз жұмды", - дейді Шалқар аудандық ауруханасының бас дәрігері Асқар Еспағамбетов.

Ал мектеп директоры оқиғаға орай күдікке алынған оқушылардың полиция бөлімшесінде екенін айтты. 

"Біз бұл хабарды кешкі сағат 20:00 шамасында естідік. Бірден 8-11 сынып оқушыларының ата-аналарына хабарласып, балаларының үйінде екеніне көз жеткіздік. Кейін аудандық полиция бөлімшесіне бардық. Төбелеске қатысы бар деген оқушылардың ата-аналары әлі ішкі істер бөлімінде жүр", - дейді мектеп директоры Алия Оспанқызы.

Мектеп басшылығы марқұм болған жеткіншектің спорттық шаралардан жүлде алып жүрген белсенді оқушы болғанын айтады.