Алматы облысында ер адам туысын мылтықпен атып өлтірді

36 жастағы ер адам өзінің туысын тіркелмеген аңшылық мылтықпен атып өлтірді деп күдіктелуде деп хабарлайды Алматы облысы полиция департаментіне сілтеме жасаған KAZ.NUR.KZ.

Есік қаласының тұрғыны - 41 жастағы ер адамның мәйітін Еңбекшіқазақ ауданы, Бөлек ауылындағы жеке үйден табылған.

Полиция марқұмның денесінен зорлықпен өлтіру белгілерін анықтады. Ер адам басынан жарақат алған.

Полиция күдіктіні бірден іздеуге кіріскен. Нәтижесінде марқұмның туыстарының бірі ұсталыпты. Күдікті ер адам да сол ауылда тұрған. Оны ұстаған соң түсінік беруге полиция басқармасына жеткізген.

Ол екеуінің арасында қызғаныштың кесірінен ұрыс болғанын, сөйтіп күдікті зардап шегушіге 16 калибрлі мылтықтан оқ атқанын мойындады.

Қару табылып, тәркіленген, сондай-ақ, іс материалдарына заттай айғақ ретінде тігілген.

Қазір күдікті уақытша ұстау изоляторында қамауда отыр. Аталған дерек бойынша ҚР ҚК 99-бабы "Кісі өлтіру" бойынша тергеу басталды.