Алматы облысында үйлену тойы адам өлімімен аяқталды

Опубликовано:

Үйлену той1
Көрнекі фото: pixabay.com

Алматы облысы Ұйғыр ауданында үйлену той үстінде туындаған жанжал барысында бір адам қаза тапты. Бұл туралы Алматы облыстық полиция департаменті Instagram-дағы ресми парақшасында хабарлады.

Құзырлы органның мәліметінше, 12 желтоқсан күні сағат 01:30-да Ұйғыр аудандық полиция басқармасының кезекші бөліміне орталық аудандық ауруханадан қоңырау түскен.

Онда Шарын ауылының 25 жастағы тұрғыны пышақ жарақатынан қайтыс болғаны туралы айтылған.

Полиция аталған фактіні Қылмыстық кодекстің 99-бабы 1-бөлігі (Кісі өлімі) бойынша тіркеген.

Оқиға орнына аттанған жедел-тергеу тобы қайғылы жағдай Шарын ауылындағы жергілікті мейрамханалардың бірінде болғанын анықтаған. Яғни тойға келген қонақтар арасында жанжал туындап, артынша төбелеске ұласқан.

Салдарынан 26 жастағы тұрғын өз замандасының кеуде тұсына пышақ салған. Жарақат салдарынан ауыл тұрғыны қайтыс болған.

Қазір күдікті ұсталып, уақытша ұстау изоляторына қамалған. Күдіктіден қылмыс қаруы тәркіленіп, заттай дәйек ретінде іс материалдарына қосылған.

Сондай-ақ, ол тойда алкогольді ішімдік ішкенін мойындаған.

Айтуынша, таныстарының текетіресін көрген ол өзімен бірге алып жүрген пышағын шығарып, оларға бет алған. Ал марқұм оны тоқтатпақ болған. Ашуға булыққан күдікті замандасына пышақ салған.

Күдікті өз ісіне өкінетінін жеткізген.

Ол сотқа дейінгі тергеу уақытында екі ай бойы қамауда болады.

Полиция басқа ақпарат ҚР ҚІЖК 201-бабына сәйкес тергеу мүддесі үшін жарияланбайтынын атап өтті.

Мақаланың түпнұсқасы: https://kaz.nur.kz/accidents/1947649-almaty-oblysynda-uilenu-toi-adam-olimimen-ayaqtaldy/