Таразда қараусыз қалған ғимараттан жасырылған атыс қарулары табылды

Таразда қараусыз қалған ғимараттан жасырылған атыс қарулары табылды, деп хабарлайды Polisia.kz.

1 ақпанда Тараз қаласы полиция басқармасының қызметкерлері жедел-іздестіру жұмыстарын жүргізу барысында қала аумағындағы қараусыз қалған ғимараттардың бірінен жасырылған атыс қаруларын тапқан.

"Арнайы жүргізіліп жатқан іс-шаралар барысында Калашников маркалы бір автомат, Streamer маркалы бір бірлік травматикалық тапанша, бір дана оқжатар мен шулы жарық бір граната тәркіленді. Анықталған қару-жарақтар бойынша сот-баллистикалық сараптамасы тағайындалды", - дейді Тараз қалалық полиция басқармасының бастығы Асылхан Заурбеков.

Тараз қалалық полиция басқармасы қарудың, оқ-дәрілердің, арнайы құралдардың орны туралы хабарлаған немесе оларды полицияға өз еркімен тапсырған адам қылмыстық және әкімшілік жауапкершілікке тартылмайтынын еске салады.

Құзырлы орган адам есімі де жасырын болып қалатынына кепілдік беріп отыр.