Ақмола облысында екі жасар бала дәретханаға құлап мерт болды

Бүгін, 14 маусымда Ақмола облысы Бұланды ауданында қайғылы жағдай тіркелді. Екі жасар бала даладағы дәретханаға құлап кетіп, көз жұмды, деп хабарлайды Polisia.kz.

Басылымның мәліметінше, 14 маусымда сағат 11:30 шамасында Бұланды аудандық полиция бөліміне ауылдардың бірінің тұрғынынан қоңырау келіп түскен.

Ол жеке үйдің ауласында жүрген 2 жасар ұлының абайсызда құдыққа құлап кеткенін айтқан. Шақырту орнына тәртіп сақшылары мен құтқарушылар, жедел жәрдем көлігі жеткен. Алайда баланы құтқару мүмкін болмаған.

"Баланың оқиға орнында есін жимастан көз жұмғаны анықталды", - дейді полицейлер.

Еске сала кетсек, 12 мамырда Түркістан облысы Қазығұрт ауданына қарасты Қазығұрт елдімекенінде дәретханаға түсіп кеткен бір жасар бала құтқарылған болатын.

Мақаланың түпнұсқасы: https://kaz.nur.kz/accidents/1974054-aqmola-oblysynda-eki-zasar-bala-daretxanaga-qulap-mert-boldy/