Күзетшінің аяқ-қолын байлап, сейфті бұзған: Талдықорғанда логистикалық компания тоналды

Опубликовано:

тонау
Фото: polisia.kz

Талдықорғанда логистикалық компанияны тонады деген күдікпен екі ер адам ұсталды, деп хабарлайды KAZ.NUR.KZ тілшісі ІІМ Polisia.kz ресми медиа-порталына сілтеме жасап.

26 шілдеде қалалық полицияның кезекші қызметіне қоймаларын құрылыс және өндірістік нысандарға жалға беретін жергілікті фирмалардың бірінің иесінен хабарлама келіп түскен.

Жәбірленушінің сөзінше, белгісіз екі ер адам түнгі уақытта кеңсеге кіріп, 63 жастағы күзетшіні байлап, сейфті бұзып, одан жалпы сомасы 2,5 миллион теңгеге жуық ақша мен зергерлік бұйымдарды ұрлап кеткен.

Ұрланған заттардың ішінде алтын сағат, әйелдерге арналған жүзік, сырғалар, сондай-ақ гауһар тасты кулон, алтын алқа, гауһар тасты сырға түріндегі жиынтық бар екені айтылған.

Полицейлер Алматы облысы Қарасай ауданында тұратын бұрын сотталған күдікті екі азаматты анықтады. Екеуі де бұрын топпен тонауға қатысқаны үшін қылмыстық жауапкершілікке тартылған.

"Ұрланған заттардың бір бөлігі, сондай-ақ қылмыс кезінде пайдаланылған қолғаптар мен бетперделер тәркіленіп, айғақ ретінде қылмыстық іс материалдарына тіркелді", - деп хабарлады полиция.

Мақаланың түпнұсқасы: https://kaz.nur.kz/accidents/1981351-kuzetsinin-ayaq-qolyn-bailap-seifti-buzgan-taldyqorganda-logistikalyq-kompaniya-tonaldy/

jitsu gif