Шымкентте үшінші қабаттан құлап кеткен үш жасар бүлдіршін аман қалды

Шымкентте бес қабатты үйдің үшінші қабатынан құлап кеткен үш жасар қыз бала аман қалды, деп хабарлайды KAZ.NUR.KZ тілшісі Шымкент қалалық ТЖД баспасөз қызметіне сілтеме жасап.

ТЖД-ның мәліметінше, оқыс жағдай 23 қыркүйек күні болған.

Сол күні сағат кешкі 21.30 шамасында Шымкент қалалық ТЖД кезекші-диспечтерлік қызметіне жедел жәрдем қызметінен хабарлама келіп түскен.

Хабарламада әл-Фараби ауданы Әлімқұлов көшесіндегі бес қабатты үйдің үшінші қабатынан 3 жасар қыз баланың абайсызда құлап кеткені айтылған.

Жедел жәрдем қызметі зардап шеккен бүлдіршінді қалалық балалар ауруханасына жеткізген. Медицина қызметкерлері қыз балаға "сол қол сүйегінің сынуы" диагнозын қойған.

Жан-жақты тексеруден кейін ол амбулаториялық ем алуға сол күні үйіне жіберілген.

"Алдын ала мәліметтер бойынша 2019 жылы туған қыз бала ересектердің қарауынсыз қалып, үшінші қабаттан құлап кеткен. Оқыс оқиғаның мән-жайын Шымкент қаласы полиция департаменті анықтайтын болады. Жыл басынан бері бұл жетінші оқиға, барлық жағдайда балалар жарақат алды. Шымкент қаласының төтенше жағдайлар департаменті ата-аналарға балаларын қараусыз қалдырмауды ескертеді", - дейді Шымкент қаласы ТЖД қоғаммен байланыс тобы.