Қарағанды маңындағы орман екпелерінен анасы мен қызының мәйіті табылды: оқиғаның мән-жайы белгілі болды

Қарағанды ​​іргесіндегі Ақтас ауылы маңындағы орман екпесінен 33 жастағы әйел мен оның 7 жасар қызының мүрдесі табылды. Оларға нақты не болғаны әзірге белгісіз. Алайда немересі мен шөбересінің өлімінің күтпеген нұсқасын олардың әжесі айтты, деп хабарлайды "Еуразия" бірінші арнасы.

Анасы мен қызының мәйіттерін саяжай тұрғындары тауып алғанша бір апта бойы орман алқабында жатқан. Полиция оларды осында өлтірді ме, әлде өлі күйінде әкелінді ме, әзірге хабарламады.

Марқұм әйелдің туыстарынан артында бұрынғы күйеуі мен әжесі қалған. Антонина Николаевна 84 жасында күйеуін, немересі мен шөбересін және екі баласын жер қойнына тапсырды. Қазір зейнеткер жалғыз өзі қалған.

"Әрине, мен сол жерде айқайладым. "Мені солармен бірге жерлеңдер!" дедім. "Бұл не, балам? Мұны кім істеді? Қалай ғана балаға қол көтерді екен? Оның анасына да қалай ғана қол жұмсады? Мен әлі тірімін. Енді кім үшін өмір сүремін?" – дейді марқұмдардың әжесі Антонина Янгель.

Оның айтуынша, немересі дұрыс өмір салтын ұстанған. Украинада туылған, кейін Қазақстандағы әжесіне көшіп келіп, сүйікті адамын кездестірген.

"Жолы болып, тұрмысқа шықты, бәрі жақсы болатын. Отбасылы болған соң балалы болды. Өте жақсы күйеу жолықты. Сондай жақсы, алтын адам! Бойшаң, келбетті. Немерем балалы болған соң депрессияға ұшырады, иә депрессияға ұшыраған еді", – деді зейнеткер.

Жас келіншек көмектен бас тартқан. Ажырасқаннан кейін ол қызымен бірге әжесіне оралады да, ешкіммен араласпай, оқшау жүрген, тіпті жеті жасар қызын мектепке де бермеген. Ол қызын жанында ұстаған және оны үйден де шығармаған.

Сосын екеуі үйден кетіп қалған. Зейнеткер немересі күйеуімен татуласқан шығар деп ойлайды, себебі күйеу баласы қызын жақсы көретін, оларға үнемі қаржылай көмектесіп тұрған. Бірақ екеуі қайтыс болған күні қайда кеткені әлі жұмбақ. Зорлық-зомбылықпен өлтірілгендей өлімнің айқын белгілері болмаған.

Антонина Николаевна бұл кісі өлтіру деп есептейді. Өлер алдында немересіне бірнеше хаттар келіп, ол оны жасырып қойған.

"Менің досым үнемі: "Немерең сектаға кірген! Ол сектаға кірді, енді олар оны құртады!", – деп айтатын. Ваннаға кіргенімде көптеген шамдар, үлкен шамдар болды",– деп атап өтті Антонина Янгель.

Еске салайық, бұған дейін Қарағанды ​​маңындағы орман екпелерінен жас ана мен оның 7 жасар қызының өлі күйінде табылғаны белгілі болған еді. Іс "Адам өлтіру" бабы бойынша қозғалды.