Шымкентте кафеге келген ер адам оқ жарақатын алып, жансақтау бөліміне түсті

Шымкентте кафеге келген ер адам оқ жарақатын алды. Қазір ол жансақтау бөлімінде жатыр, деп хабарлайды Ішкі істер министрлігі Telegram-дағы ресми арнасында.

Ведомствоның мәліметінше, 7 қазан күні сағат 04:30 шамасында әл-Фараби аудандық полиция басқармасына қалалық ауруханаға оқ жарақатымен ер адамның жеткізілгені туралы хабарлама келіп түскен.

Бұл дерек Қылмыстық кодекстің 24-бабы 3-бөлігі және 99-бабы ("Адам өлтіруге оқталу") бойынша СДТТБТ-да тіркелген.

Тергеу барысында кафелердің бірінде белгісіз тұлғалар қарудан оқ атып, келушіні жарақаттап, оқиға орнынан бой тасалағаны анықталған.

Жедел-іздестіру шараларының барысында полицейлер ВАЗ-21014 автокөлігін анықтап, оның салонынан екі қару тапқан.

"Қазіргі уақытта күдіктілерді ұстау бойынша іс-шаралар жүргізіліп жатыр. Іс қалалық прокуратура мен полиция департаменті бастығының жеке бақылауына алынды", - дейді ведомство өкілдері.

Сондай-ақ ведомство жарақат алған ер адамның жансақтау бөлімінде екенін мәлім етті.