Ұлытау облысында қосалқы стансада 5 жасар баланы тоқ соқты

Ұлытау облысында бес жасар бала қосалқы стансада тоқ соқты. Баланың аяқ-қолын күйік шалған, деп хабарлайды KAZ.NUR.KZ. Бұл туралы Ұлытау облыстық көпсалалы аурухана өкілдері мәлімдеді.

Белгілі болғандай, бала үй ауласында ағасымен ойнап жүріп, бірнеше минут бойы үлкендердің қарауынсыз қалған. Дәл осы сәтте ол қосалқы станса аумағына кіріп, жоғары кернеуде тұрған трансформатор қалқанын екі қолымен ұстаған. Баланы анасы аяғы тұтанып жатқан жерінен тауып алған.

"Мен балалардың ойнап жүргенін көрдім. Бірақ балам қосалқы стансаға барады деп тіпті ойламадым. Ол сарайдың жанында, шамамен 30 метр жерде орналасқан. Неге баламның ол жерге барғанын білмеймін. Мен келсем балам ес-түссіз жатыр екен, аяғы тұтанып жатты. Мен оған топырақ сеуіп, тыныс алмай жатыр деп ойлап, үйге қарай көтеріп ала жүгірдім. Ол ентігіп демала бастағанда, мен жылап жібердім. Медбике шақырдым, бізді Жезқазған ауруханасына жатқызды. Онда бірнеше күн жансақтау бөлімінде жаттық" - деді баланың анасы.

Қазір жарақаттанған баланың жағдайы тұрақтанған. Баланың аяғына тиісті ем-дом жасалуда. Болашақта оның оң аяғының терісін ауыстыру операциясы қажет болуы мүмкін.

"Менің балам мәңгіге ақсақ болып қалуы мүмкін. Оның эмоционалдық жағдайына алаңдаймын, өзінің тілі жай шыққан еді, қазір мүлдем үндемейді. Болған оқиғаны түсінде көреді", - дейді анасы.

Ұлытау өңіріндегі көпсалалы аурухана қызметкерлері баланың жағдайын айтты.

"2017 жылғы науқас электр жарақаты, екі шынтақ буыны, жамбас, аяғының 15 пайыз аумағын термиялық күйік шалу диагнозымен түсті. Баланың анасының айтуынша, ол медициналық мекемеге барар алдында бірнеше сағат бұрын электр қалқанының трансформаторынан күйік алған. Бала жансақтау бөліміне жатқызылды, жағдайы тұрақтанғаннан кейін ол балалар хирургиясы бөлімшесіне ауыстырылды. Қазіргі уақытта жара жазылуда, таңу жұмыстары жүргізілуде. Баланың жағдайы тұрақты. Балалар хирургиясы бөлімінде емдеу жалғасады", - деді емдеу мекемесі өкілдері.