Катамараннан теңізге сүңгіген: Маңғыстауда жас жігіт Каспийге батып кеткен

Маңғыстау облысында қайғылы жағдай болды – Каспий теңізіне демалуға барған 18 жастағы жігіт суға батып кетті. Алайда оның денесі әлі табылмай жатыр, деп хабарлайды Төтенше жағдайлар департаментіне сілтеме жасаған KAZ.NUR.KZ.

Маңғыстау облысы төтенше жағдайлар департаментінің Instagram-дағы парақшасында жарияланған ақпарат бойынша, қайғылы жағдай жексенбі, 25 тамызда Ақтаудағы "Солдатский" жағажайының маңында болған.

Құтқарушылардың айтуынша, Маңғыстау облысының 2006 жылғы тұрғыны катамараннан сүңгу кезінде қаза тапқан.

"25 тамыз 17:40 шамасында 112 пультіне Ақтау қаласы Ақжелкен елдімекені, "Солдатский" жағалауынан 300 метр қашықтықта 2006 жылғы жігіттің суға батқаны жөнінде хабарлама келіп түсті.

Қазіргі уақытта шақыртылған жерде 5 қайық, 15 жеке құрам, 2 техника және бір дрон іздестіру жұмыстарын жүргізіп жатыр", - деді Төтенше жағдайлар департаменті өкілі.

Еске сала кетейік, 21 тамызда Атырау қаласына қарасты Ақжар ауылында 14 жастағы бала суға батып кетті. Баланың денесі әлі табылмады.