"Бетінен тепкен": қызылордалық әйел ұлы үшін сот алдында жауап берді

Қызылордада мектеп оқушысы сыныптасының бетіне соққы жасап, дене жарақатын салды. Баласының әрекеті үшін анасына айыппұл салынды, деп хабарлайды облыстық сотқа сілтеме жасаған KAZ.NUR.KZ.

Соттың Telegram-дағы арнасында пайда болған ақпаратқа сәйкес, Қызылорда облысының кәмелетке толмағандардың істері жөніндегі мамандандырылған ауданаралық сотында "Әкімшілік құқық бұзушылық туралы" кодексінің 127-бабы 3-бөлігімен азаматшаға қатысты іс қаралды.

"Азаматшаның кәмелетке толмаған ұлы сыныптасының бет тұсынан бір рет теуіп, дене жарақатын салып, қылмыстық құқықбұзушылық белгілері бар қасақана іс әрекет жасауына алып келген іс-әрекет жасаған", - делінген сот хабарламасында.

Яғни, азаматша ұлының тәрбиелеу және білім беру оның құқықтары мен мүдделерін қорғау жөніндегі міндеттерді орындамау, қылмыстық құқық бұзушылық белгілері бар қасақана іс-әрекет жасауына алып келген іс-әрекетті жасауына жол берген.

"Азаматша сотқа берген түсінігінде әкімшілік құқықбұзушылық туралы хаттамамен келісетінін, енді қайталанбайтынын айтты", - делінген хабарламада.

Сот қаулысымен әйел Қазақстан Республикасы "Әкімшілік құқық бұзушылық туралы" кодексінің 127-бабының 3-бөлігімен кінәлі деп танылып, 51 688 теңге көлемінде айыппұл арқалады.